Brasilia dearvvašvuođaeiseválddit duođaštit ahte vuosttáš eamiálbmogii Amazonasis lea njommon koronadávda.
20-jahkasaš eamiálbmot nisson gullá Kokoma-álbmogii Amazonasis. Sus lea duođastuvvon ahte lea njommon koronadávda, dieđihit Brasilia eamiálbmoga dearvvašvuođaguovddáš Sesai Reutersii.
Nisson bargá dearvvašvuođaguovddážis Santo Antonio do Içás, Colombia ráji nalde ja dan guovllus leat vel njeallje koronai njommon olbmo dieđihuvvon. Dat lea várra ahte dávda njoammu eanet olbmuide guovllus.
20 jahkásaš eamiálbmot nissonis eai leat leamaš dávdamearkkat muhto lea duođastuvvon ahte sus lea covid-19 dávda. Son lea biddjon dal erremii ovttas su bearrašiin. Dávda galgá njommon doaktáris mii barggai seamma dearvvašvuođaguovddážis go nisson.
Stuora njommunvárra
Dearvvašvuođačeahpit váruhit ahte koronadávda sáhttá leahkit váralaš guvlui ja eamiálbmogiidda.
Jus dávda njoammu sáhttá dat leahkit heaggáváralaš olu eamiálbmogiidda boaittobealguovlluin Amazonasa vuovddis. Brasilias Amazonasis leat eanet go 850 000 eamiálbmogat geat dávjá orrot ovttas smávva gilážiin gos njoammunvárra lea allat.
