Norgga Mohtorvaláštallan Searvi (NMS) lea dieđihan Kárášjoga mohtorsearvái ahte eai oaččo lobi lágidit amatevraluohká, liseanssa ja doavttirduođaštusa hága.
– Leat ođđa liseansagáibádusat boahtán dán jagi ja daid fertejit searvvit čuovvolit, lohká Norgga Mohtorvaláštallan Searvvi suorgekoordináhtor Gunnar Naas.
Váikkuha Kara-X gilvvuide
Kárášjoga mohtorsearvi lágida beakkán Kara-X skohtercrossgilvvuid beassášlávvardaga Kárášjogas, gos maŋemuš jagi leat sihke dálá, ovddeš ja ođđa skohtervuoddjit beassán gilvalit iešguđet luohkáin. Kárášjoga mohtorsearvi lea guokte maŋemuš jagi vuovdán oahppásmahttinliseansa, muhto dál lea NMS čavgen njuolggadusaid ja beahttalit searvvi vuovdimis dakkár liseanssaid.
– Dál fertejit skohtercrossavuoddjit váldit liseansakurssa, mii háliidit ahte skohtercrossa valáštallan galgá stuorrut ja dan sivas maid háliidat doalahit dán luohká, dadjá Kárášjoga mohtorsearvvi jođiheaddji Per Tommy Eideng. Son lohká NMS dieđu boahtán veaháš fáhkka, ii ge searvi leat váidán NMS gáibádusa, muhto áigot doahttalit gáibádusa.
Vuorkágovva: Inga Marie Guttorm
Hállu bisuhit luohká
Kárášjoga mohtorsearvvi jođiheaddji Per Tommy Eideng lohká dattetge háliidit doalahit amatevraluohká go vásiha olbmuin leat beroštumi dasa. Son muitala čoavddus lea ahte sii geat áigot ja háliidit vuodjit, čađahit liseansakurssa maid Kárášjoga mohtorsearvi sáhttá lágidit.
– Vuoddjit fertejit maiddái váldit oktavuođa doaktáriin ja oažžut doavttirduođaštusa ahte sáhttet vuoddjit. Sis geas leamašan liseansa ovddežis sáhttet ohcat ođasmahttit dan, lohká Eideng.
Gearggus
Kárášjoga mohtorsearvi lea álgán ráhkkanit jahkásaš dáhpáhussii, ja vudjet ijat beivviid muohttaga Kárášjoga ovddeš spáppačiekčan šilljui mii lea guovdu márkana.
– Dál leat gergosat, mis orro leamen doarvái muohta ja illudan doaluide. Dán jagi eat boađe árvideames bártidit nu ollu šilljuin, go gielda lea oastán ođđa lahttoduolbmanmašiinna man beassat geavahit. Leat hui giitevaččat dainna, loahpaha Eideng.
