-Almmuhus-
OĐĐASAT Álttás leat iskan lea go olbmuin korona­dávda 

Álttás leat iskan lea go olbmuin korona­dávda 

-

-

Eambbo go ovtta olbmo Álttás leat iskan lea go njommon koronadavda, duođašta suohkana váldodoavttir. Son sihtá dál olbmuid váldit oktavuođa doaktáriin jus dovdet sis leat influeansasymptomat.

Álttá  suohkana váldodoavttir Frode Øvrejord duođašta duorastaga  Altapostenii ahte sii leat iskan olbmuid Álttás lea go njommon koronadávda.

–  Jo, leat iskan moaddása geat eai dieđe sihkkarit leat go sii guoskan olbmuide geaidda lea njommon dávda. Iskosiid leat sádden Romssa buohccevissui, muhto eat leat vel vástádusa ožžon, dadjá Øvrejord.

Ii duođastuvvon

Øvrejord ii loga diehtit goas ožžot vástadusa.

– Lea váttis diehtit go lea stuorra jearru ja unnán iskandálkasat. Eai hálit nohkkot iskandálkasiin, vai sis leat dat jus duođalit áššit čuožžilit, dadjá Øvrejord. 

Guoskkehan

Son muitala ahte lea sáhka olbmuin geain lea leamaš guoskevuohta olbmuide geat leat johtán dahje lea leamaš báikkiin gos lea korona.  Son ii loga kommenteret  goas sii leat čađahan iskosa dahje guhte guovllus dat olbmot leat johtán, dahje leat go sii johtán seamma girdi mielde mas lei Romssa nisu geasa lea njommon dávda.

Váldet oktavuođa doaktáriin

Obbalaččat čilge Øvrejord ahte lea deháláš ahte olbmot, geat leat johtán, eai dušše Kiinná guovllus, muhto maiddái Eurohpás, váldet oktavuođa jus dovdet influensasymptomaid. 

– Dás ferte čuovvut leage-várrogas-prinsihpa. Jus eai váldde oktavuođa, de sii leat mielde servodahkii njoammudeames dávdda. Dalle njoammu dávda lagamuččaide. Jus lea egoista, de ii šatta das systema, dadjá son.

Čuojahit

Son deattuha ahte sii geat dovdet symptoma eai galgga váldit oktavuođa doavttervávttain, muhto vuos čuojahit sidjiide.

– De galget čuojahit doaktárii. Dasto ožžot dieđu sáhttet go ieža vuodjit dahje sihtat earáid doalvut jus eai nagot ieža vuodjit. Eai galgga drošše dahje busse váldit,  vai eai njoammut dávdda.  Sii galget sisa boahtit duogábeale doavttervistti gos ambulánssa sisabeassan lea. Das váldit iskkademiid. Guokte iskosiid njunis ja čoddagis. Dasto sáddet iskosiid Romsii, oktan dieđuiguin gos dat olmmoš lea johtán ja geainna lea ovttastallan maŋimuš 14 beaivvi. Jus ii lea nu buohcci ahte ferte buohccivissui, de mii sirret sin ruoktut. Fástadoavttir čuovvu de sin, čilge son.

Amas hástalus

Øvrejord árvvoštallá dađis leat go sii gergosat dustet koronahástalusa.

– Eat dieđe man garas ja njoammu virus lea.  Lea váttis einnostit leat go gergosat, muhto jus buohccájit ollugat, de fertet dustet hástalusa, dadjá Øvrejord, gii vel lasiha vel ahte sii vuoruhit koronavirusa ovddos guvlui. 

- Advertisement -
-Almmuhus-