ikte eahket duođaštuvvui guđa olbmos korona Álttás.
Ikte maŋŋit eahket dieđihii Álttá suohkan ahte guđa olbmui lea njommon korona sin suohkanis.
Eahkes dieđihii vuos Álttá sátnejođiheaddji, Monica Nielsen ahte ovtta olbmos lea duođaštuvvon korona njoammudávda. Dan oktavuođas bidje vel guoktása erremii, go leaba leamaš oktavuođas dainna olbmuin.
Muhtun diimmuid maŋŋel dieđihuvvui ahte dan guoktásis maid lea korona, nu ahte ledje de fáhkka golmmas geain lei duođaštuvvon dat dávda. Go ledje guorramen gos dávda boahtá, de bidje ovtta mánáidgárdeossodaga erremii, ja vel moadde olbmo geain ii leat gullevašvuohta mánáidgárdái.
Hui maŋŋit eahket bođii vel diehtu ahte Álttás leat oktiibuot guđas geain dál lea duođaštuvvon korona.
Otná beaivvi mielde bohtet Álttá suohkanis eanet dieđut.
