Álttá sámi giellaguovddáš lea dán jagi viiddidan ja lea dál sihke giella-ja kulturguovddáš. Dan oktavuođas lea sis leamaš nammagilvu, ja dál leat molson nama.
Lávgu (Álttá sámi giella-ja kulturguovddáš) lea ođđa namma. Jurdda lea eanaš geavahit nama «Lávgu».
– Mis lei sávaldat oažžut álkes ja vuogas nama. Nammagilvui bohte 17 nammaevttohusa. Mii giitit buot oassálastiid beroštumi ovddas, cealká Lávgu beaivválaš jođiheaddji Marit Kirsten Eira preassadieđáhusa bokte.
Namma Lávgu evttohuvvui dán vuođul:
«Lávgu – Lávgumis. Mun jurddašan ahte ođđa guovddážis lea sáhka giela ja kultuvrra lávggodeamis. Namma čujuha giellalávgumii, kulturlávgumii. Ahte mii Álttás dárbbašat báikki gos mii sáhttit čiekŋudit gillii ja kultuvrii. Mu evttohus livččii ahte guovddáža namma livččii Lávgu, ja ahte guovddáža namma livččii Álttá sámi giella- ja kulturguovddáš.»
Lei Eva Josefsen gii evttohii nama Lávgu, ja vuittii gilvvu.
