Álttá koronalogut eai leat lassánan, muhto bissot beare badjin.
Álttá suohkanis ledje bearjadaga 79 olbmo isolašuvnnas. Sátnejođiheaddji Monica Nielsen dieđiha ahte ledje 14 olbmo geat bearjadaga gárte isolašuvdnii. Duorastaga šadde ges 13 olbmo isolašuvdnii.
– Mis leat leamaš logut gaskal 90 ja 100. Lea vihtta beaivvi isolašuvdna, nu ahte dat dieđusge rievddadallá veaháš. Muhto eai leat goit njiedjan logut eai ge lassánan dál. Dál lea gal ain beara badjin, muhto lea positiiva go eai lassán, dadjá Nielsen.
Son dieđiha ahte leat eanas mánát ja nuorat geaid gaskkas lea njoammun. Lea veaháš buozalmasvuohta dearvvašvuođasuorggis, muhto eanas deaddu dovdo skuvllain.
– Doppe lea ollu jávkan. Ávžžuhan olbmuid iskat iežaset ruovttus, ja bissut ruovttus jus leat buohccit, muitala Nielsen.
Sii eai leat árvvoštallan ođđa doaibmabijuid eará go daid ávžžuhusaid maid leat juo buktán mannan vahkku. Namalassii ávžžuhusat doalahit gaskka ja njálbmesuoji geavahit. Sii geat dikšunbargguin leat, fertejit atnit njálbmesuoji.
