Vaikke Team Sirma IL lei guhká ovddemusat, de nagodii Nordlysbyen sihkkeljoavku časkit sirbmálaččaid Onroad Finnmark sihkkelgilvvuin.
Vaikke Team Sirma IL lei guhká ovddemusat, de nagodii Nordlysbyen sihkkeljoavku časkit sirbmálaččaid Onroad Finnmark sihkkelgilvvuin.
Mannan vahkkoloahpa lágiduvvui Onroad Finnmark sihkkelgilvu. Sihkkelastin dáhpáhuvvá geaidnoráigge ja mátki lea 444 kilomehtera guhkki. Vuolgga lea Álttás, ja oasseváldit de sihkkelastet Kárášjohkii, Levdnjii, Skáidái ja fas Áltái Suoidneleavšši badjel.
– Finnmárkkus eai leamaš vel bahkka geassebeaivvit, baicce lea čoaskkis ja arvi. Oasseváldit vásihedje masá 0 gráda ihkku, čállet lágideaddjit preassadieđáhusas.
Áltálaččaide vuoitu
Sihkkelgilvvus lea sihke joavko- ja individuálasihkkelastin. Joavkogilvvus oasálastet golbma joavkku.
– Team Sirma IL ja Nordlysbyen joavkkuin ledje sávrrimus sihkkelastit. Goappašat joavkkut mearridedje sihkkelastit jođánit, ja Sirbmá lei guhká njunnošis. Moadde miilla ovdal moala čájehedje áltálaččat fámuid ja vuite gilvvu 11 minuhtain, lohket lágideaddjit.
7 sihkkelasti 15 albmá vuostá
Gaskamearálaččat dulbmot joavkosihkkelastit 35-40 kilomehtera diimmus. Nordlysbyen ádjánii 14 diimmu ja 20 minuhta vuolggasajis mollii, sis ledje 15 sihkkelasti joavkkus. Team Sirma IL ges ádjánii 14 diimmu ja 31 minuhta, sis ledje 7 albmá joavkkus. Goalmmádin šadde 12 sihkkelasti geat ovddastedje Team Stål og Gummi.
Gamst Moen falimus
Onroad Finnmark lágiduvvo nuppes. Dievdoolbmot individuálagilvvus ledje juhkkojuvvon guovtti oassái, dievddut 20-44 jahkái ja dievddut badjel 45 jagi. 51-jahkásaš Torgeir Gamst Moen, gii ovddasta Salten Brann IKS Bådådjos lei falimus buot dievdduin, son vuittii vaikke sutnje bidjui ráŋggáštusáigi go sihkkelasti boastut Álttá gávpotguovddážii. Vuoiti ádjánii 16 diimmu ja 15 minuhta. Svein Sundquist, Håvard Thomassen ja Håvard Lunde sihkkelaste 20-44 jahkásaččaid luohkás ja bohte oktanaga mollii.
Paltto jođáneamos nisu
Sihkkelgilvvuin lei maiddái nissonluohkká, ja ovdal gilvvu lei Målfrid Paltto favorihttan. 19 diimmus ja 26 minuhtas ollii son mollii ja lei maiddái jođáneamos nisu gilvvuin. Gry Elde bođii nuppi sadjái, goalmmádin Hilde Skaret ja njealját sadjái ges Hege Fjellheim.
Onroad Finnmark teknihkkalaš lágideaddji lea Nordlysbyen Sykkel. Boahtte sihkkelgilvvut leat meahccesihkkelastimat Offroad Finnmark mii álgá suoidnemánu 25. beaivvi.
Onroad Finnmark oasseváldit sihkkelastet geaidnoráigge, sihkkelgilvu lágiduvvui nuppes. Govven: Onroad Finnmark/Niels Westphal
