Fylkkamánni oaivvilda Lákkonjárgga orohat lea biehttalan logahit ealu, ja lea sádden dieđu ahte jus eai logat de vurdet beaivesáhkut. Orohaga ovdaolmmoš lohká dat lea áibbas boastut, go sii han mihte logahit.
Fylkkamánni oaivvilda Lákkonjárgga orohat lea biehttalan logahit ealu, ja lea sádden dieđu ahte jus eai logat de vurdet beaivesáhkut. Orohaga ovdaolmmoš lohká dat lea áibbas boastut, go sii han mihte logahit.
Finnmárkku fylkkamánni lea bures boahtán johtui dárkkistit boazolohkamiid Oarje-Finnmárkkus. Dássážii leat guđa orohaga boazologut dárkkistuvvon.
Leat oktiibuot 14 orohaga mat galget dárkkistuvvot dán čavčča. Muhto eai leat buohkat mat leat lágidan ealu dárkkistuvvot nu go gohččun lea boahtán fylkkamánnis ja nu go lohkannjuolggadus gáibida.
– Biehttalan logahit
Eanandoallodirektoráhtta lea fylkkamánnis ožžon dieđu ahte plánejuvvon dárkkisteami ii sáhttán čađahit Lákkonjárgga orohagas, go buot siidaosiid jođiheaddjit eai lean láhčán dili dainna lágiin.
Buot siidaosiid jođiheaddjit leat aitto ožžon gáibádusa ahte galget heaitit lobihuššamis. Dain lea ođđa áigemearri logahit ealuideaset ovdal juovlamánu 31. beaivvi 2015.
– Jus eai leat logahan áigemeari siskkobealde, de álgá beaivesáhkku ođđajagimánu 1.beaivve rájes 2016:s. Dat siidaoasit mat leat biehttalan logaheami, ožžot beaivesáhku dan rájes go plánejuvvon logaheapmi livččii galgan čađahuvvot, dadjá Liv Berit Hætta gii lea sekšuvdnahoavda Eanandoallodirektoráhta boazodoalloossodagas.
Áibbas boastut
Lákkonjárgga orohaga ovdaolbmo Hans Ole Eira imáštálla fylkkamánni go oaivvilda dat lei fylkkamánni ieš guhte ii dáhtton lohkat sin ealu.
– Mii leimmet láhčán ealu lohkanláhkái go rátkkašeimmet, muhto guokte siidaoasi eaiggáda leigga buohccindieđihuvvon ja eaba sáhttán logahit ealu. Fylkkamánni lei boahtán boazolohkiiguin gárddi lusa, muhto doppe bivddii minguin čoahkkima girtno siste gos mearridii ahte maŋidit buot 16 siidaosiid lohkamiid go eai sáhte buot siidaosiid bohccuid lohkát. Danne lea áibbas boastut go sádde reivve mas lohká min bahádáhkkin, vaikko ieža leat bissehan lohkamiid, lohká Eira.
Almmuhuvvon vearredáhkkin
Eira atná maid unohassan go maiddái Eanandoallodirektoráhtta boazodoalloossodaga neahttasiidui leat almmuhan sin orohaga vearredáhkkin, ja jorahan dan guvlui ahte lea sin orohat mii lea gieldán sin lohkat ealu.
– Ii leat mange veara, ja vel go ovttatmanos oaččuimet dieđu ahte sáhkkohallat jus eat čuovo gáibádusaid. Orro dego ovdalgihtii juo mearridan ahte mii eat boađe diktit logahit ealuid, ja danne dovddan ahte mii oaguhuvvot, lohká son.
Áigu váidit
Eira áigu dál čállit váidaga go oaivvilda dat lea áibbas boastut.
– Mun ipmirdivččen ahte jus livččiimet duođas gieldán logahit ealu ja gevren boazolohkkiid mannat, muhto ii han dat leat duohta, lohká son.
Beaivesáhkut
Eanandoallodirektoráhtta diehtá ahte leat máŋga orohaga mat leat johttán dálveorohahkii, eai ge leat dieđihan fylkamánnái ja nu maid eai leat lágidan ealu nu ahte sáhttá lohkat ovdal johte dálveorohahkii.
Nu ii leat fylkkamánni gáibádus logahit ealu čuvvojuvvon.
– Danin šaddá das dakkár váikkuhus ahte bidjat beaivesáhku juohke siidaoasi jođiheaddjái dain orohagain mat eai logat ealuideaset nu go fylkkamánni lea gohččon, dadjá sekšuvdnahoavda.
