Biibbalsearvvit Norggas, Suomas ja Ruoŧas leat ovttas jorgalan Biibbala sámegillii. Dál leat geahčái olleme, ja mihttun lea leamaš jorgalit biibbala vai sámegielagat buot golmma riikkain ipmirdit biibbala bures.
Biibbalsearvvit Norggas, Suomas ja Ruoŧas leat ovttas jorgalan Biibbala sámegillii. Dál leat geahčái olleme, ja mihttun lea leamaš jorgalit biibbala vai sámegielagat buot golmma riikkain ipmirdit biibbala bures.
Biibbalsearvvit Norgga Biibbalsearvi, Svenska Bibelsällskapet ja Suomen Pipliaseura leat ođđasit jorgalan Biibbala davvisámegillii.
Ođđasit jorgaluvvon teavsttat almmuhuvvojit Kárášjogas Luther-ávvudeamis dán mánu maŋemuš ja nubbin maŋemuš beivviid. Dan dieđiha Norgga Biibbalsearvi preassadieđáhusas.
– Biibbalserviide lea dehálaš ahte ođđa jorgaleapmi šaddá áddehahtti nu olusiidda go vejolaš. Seammás lea áigumuš doalahit juoidá 1895 biibbalis. Dánska-norgga biibbalgiella váikkuhii sámi biibbala maid. Mihttun dan ođđa jorgaleamis lea hábmet sámegielat biibbalgiela mii lea lagabut sámegiela mii lea biibbalis, ja maid lagabut sámegiela mii hubmo ja čállo buot golmma riikkain, čuožžu preassadieđáhusas.
Luther-ávvudeapmi
Oassin barggu loahpaheamis lea guovddáš biibbalteavsttaid almmuheapmi. Dat dáhpáhuvvá Kárášjogas golggotmánu 30. ja 31. beaivvi.
Mánnodaga lea sálbmaeahket, ja lohket ođđasit jorgaluvvon teavsttaid boares testameanttas. Báikkálaš musihkkarat ja lávlut servet.
Disdaga lea logaldallan Luthera birra, Per Oscar Kjølaas bokte. Luther maiddái jorgalii biibbalteavsttaid eará gielaide. Giellakonsuleantta ja biibbaljorgaleaddji Rávdná Turi Henriksen almmuha ođđasit jorgaluvvon «Áhččámet» ja Juovlaevangeliuma. Goappaš eahkediid lea ságastallan ođđa jorgaluvvon teavsttaid birra.
Dát dáhtonat eai leat soaittáhagas válljejuvvon. Golggotmánu 31. beaivvi ávvudit reformašuvnna. Martin Luther lei ieš biibbaljorgaleaddji. Sus lei áigumuš almmuhit biibbalaš gáldoteavsttaid dakkár gillii mii lei áddehahttit. Dat lea maid váikkuhan maŋit jorgalemiid Skandinavias ja eará riikkain.
Almmuhuvvo guovtti jagi geahčen
Prošeavttas leat leamaš mielde bargit buot golmma riikkain. Bargu lea loahpahuvvome. Vuosttaš sámi biibbal almmuhuvvui jagi 1895. Ođđa testameantta jorgaluvvui ođđasit 1998.
Ođđa davvisámegielat biibbal galgá almmuhuvvot Guovdageainnus borgemánu 2019. Sihke ođđa ja boares testameantta leat ođđasit jorgaluvvon davvisámegillii.
– Lea hirbmat gáibideaddji bargu. Danne háliidit biibbalsearvvit almmuhit geahččalanteavsttaid nu árrat go vejolaš. Teavsttat lohkkojit girkus. Mii sávvat gullat movt gulliid mielas orrot dat ođđa teavsttat, ja bovdet buohkaid boahtit muitalit makkárat orrot, ja mo sáhttá buoridit. Dát dieđut váldojit mielde viidáset barggus, čállet preassadieđáhusas.
