Politiijat leat ohcamin 80-jahkásaš Odd Henry Lahm gii lea dieđihuvvon láhppon.
Finnmárkku politiijat almmuhit dál albmá nama gii lea láhppon Deanus. 80-jahkásaš Odd Henry Lahm lea dieđihuvvon láhppon, son orru Sieiddás Deanus.
Ii dáidde diehtit ahte lea láhppon
Politiija bijusjođiheaddji Tommy Michaelsen, lohká almmái lea demeansabuohcci ja son ii dáidde diehtit ahte olbmot leat su ohcamin. Dasa lassin dieđiha son ahte almmái lea issoras lášmat ja sii dađibahábut eai dieđe makkár biktasat albmás ledje badjelis go guđii iežat ruovttu Sieiddás.
– Mii ávžžuhit olbmuid geahččat iežaset visttiin lea go almmái náđđon muhtin vistái, jus soittii leat galbmon ja ohcalan lieggasa. Almmái lea hui lášmat ja son ii soaitte áddet ahte lea láhppon, dadjá Tommy Michaelsen.
Ohcamin
Leat badjelaš 50 olbmo ohcamin albmá, Sea King ja Áibmosuodjalus helikopterat leat girdimin ja ohcamin albmá. Earet eará leat Norgga gádjunbeatnagat, Rukses ruossa, Siviilasuodjalus, buollinčáskadeaddjit, SNO ja eaktodáhtolaččat maid ohcamin albmá Deanus.
Dieđihii iežas eaktodáhtolažžan
Beaska Niillas dieđihii iežas eaktodáhtolažžan ohcat albmá gii lea láhppon ja lohká son lea maiddái ovdal searvan ohcat olbmuid geat leat leamašan láhppon.
– Láhppon olbmuid gal ferte ohcat go astá. Láven álo searvat ohcat olbmo jus asttan ja jus lean lahkosis, dadjá Beaska Niillas.
Son ii loga iežas nu oahppis dan guovllus gos leat ohcamin albmá, muhto lohká gal váccašan moddii guovllus.
Viidát ohcamin
– Mii leat viidát ohcamin albmá ja maiddái hui dárkilit. Ohcanveahka lea ohcan Sieiddás, Luovttejogas, Deanu Šalddis gitta Deanu njálbmái. Mii diehtit ahte šaddá čoaskkis ihkku, nu ahte lea dehálaš ohcat albmá seamma deattuin, lohká Michaelsen.
Ávvir dieđuid mielde lea oassi ohcanveagas vuolgán ohcat albmá duoddaris gos sus lea goahti.