Elektrovnnalaš lohkanveahki almmuhuvvo davvi sámegielas dán gaskavahkku.
Elektrovnnalaš lohkanveahki almmuhuvvo davvi sámegielas dán gaskavahkku.
Sámediggi lea ovttas Acapela Group AB, Divvun ja Giellateknoin Romssa Universitehtas ovddidan hupmansyntesa davvisámegiela várás. Hupmansyntesa lea giellateknologalaš veahkkeneavvu buohkaide geain lea čállin- ja lohkanárut, ja maid buot earáide geat dárbbašit veahki lohkat.
– Lean hui ilus go sámegielas dál lea vejolašvuohta geavahit dán teknologiija. Teavsttas-hupmamii vuogádat lea buorre veahkkeneavvu, ja lea šaddan dehálaš veahkkeneavvu ollu máilmmi giellakultuvrraide. Dán veahkkeneavvu sáhttet maid geavahit sii geat geahččalit oahppat sámegiela, ovdamearkka dihte oažžut lohkkojuvvot neahta ja neahttaáviissaid sisdoalu, dadjá sámediggepresideanta Aili Keskitalo.
Teavsttas hupmamii
Hupmansyntesa lea namma dan sierralágan dihtorprográmmas, mii sáhttá ráhkadit teavstta olbmo jietnan. Prográmma sáhttá lohkat teavstta, dehe sáhttá buvttadit hupmama eará dieđuid vuođul. Teavsttas-hupmamii vuogádat lea ráhkaduvvon dábálaš geavaheapmái, ja sáhttá lohkat iešguđetge teakstašlájaid ja gieđahallat buot grammatihkalaš ja riektačállima beliid dohkálaččat.
Elle ja Biera jienat
Jietna mii geavahuvvo lea juogo goansta (syntehtalaš) dehe olbmojietnan dahkkon. Davvi sámegiela hupmansyntesas sáhttit dál gullat Elle ja Biera jienaid.
Sámediggi bargá viidáseappot hupmansyntesa ovddidemiin julevsámegiela ja lullisámegiela várás.
Kárášjoga Sámedikkis gaskavahkku 6. b. dii. 12.30 čoahkkinlanjas 121 almmuhuvvo hupmansyntesa, dieđiha Sámediggi neahttasiiddus.
