-Almmuhus-
OĐĐASATAlmmuhit iežaset vuosttaš skearru

Almmuhit iežaset vuosttaš skearru

-

-

Kárášjoga joavku Felgen Orkester almmuha iežas vuosttaš olles skearru boahtte vahkkus.

Boahtte bearjadaga, juovlamánu 4. beaivvi almmuha Felgen Orkester iežaset vuosttaš skearru, «skealbma mojit». Sii almmuhit skearru sihke digitálalaččat ja dábálaš CD hámis.

 

Guhkebuš konsearta

Lávvordaga juovlamánu 19. beaivvi dollet sii almmuhankonseartta Kárášjogas, ja joavkku čuojaheaddji Petter Tretnes Hansen, muitala iežaset dalle áigut doallat guhkebuš konsearta, vai guldaleaddjit besset gullat daid ođđa lávlagiid maid albma ilmmis.

 

Ain Felgen šuokŋa

Ođđa skearru birra muitala Tretnes Hansen ahte sii leat das ovttasbargan buvttadeddjiin, Áltálaččain Kjetil Linnesain, guhte lea leamaš mielde dan kreatiivvalaš barggus ráhkadit sihke teavsttaid ja šuoŋaid.

– Mii leat geahččaladdan ođđa šáŋŋeriiguin, nugo «country» ja Irlándalaš álbmotmusihkain mii addá skearrui viidát jietnagova. Muhto lihkka lea ain skearrus čielga Felgen šuokŋa,  mii lea melodiijalaš lávlagat main leat mihtilmas refreaŋŋat, lohká son.

 

Heive buohkaide

Tretnes Hansen muitala skearrus leat 11 lávlaga, ja buot leat čállon davvisámegillii.

– Mii válljet čállit sámegilli, dat lea lunddolaš go dat lea min eatnigiella ja dan mii máhttit buoremusat. Mii álggaheimmet ge joavkku 2012:s go min mielas váilui juste dákkár musihkka sámegillii. Min musihkka lea bures váldon vuostái ain juo Sámis, ja mii leatge ožžon máhcahemiid ahte sihke mánát ja boarrásit olbmot liikojit dasa, nu ahte dat heive buohkaide, lohká son.

 

Álgán nuppiin skearruin juo

Tretnes Hansen lohká sis ii leat leamaš nu alla mihtut ollet dál nu viidát ja guhkas dainna musihkain, dušše čuojahit go sii ieža liikojit dan musihka.

– Eat leat vel árvvoštallan álgit nu movt eaŋgalasgillii lávlut, olahandihti guhkelii ja leat duhtavažžat čuojahit sámegillii, lohká son.

Felgen Orkester leage juo álgán plánet boahtte skearru, ja sii leat juo duhkoraddame idéaiguin dan skerrui.

 

 

-Almmuhus-