Son gohčoda iežas Evvan Sapmelash artistanamman, duohta máilmmis lea su namma Vasilij Maminov (39) Mončegorskas eret Guoládatnjárggas Ruošša bealde. Mannan geasi almmuhii musihkkaskearru gillii man beaivválaččat eai huma nu olusat.
Son gohčoda iežas Evvan Sapmelash artistanamman, duohta máilmmis lea su namma Vasilij Maminov (39) Mončegorskas eret Guoládatnjárggas Ruošša bealde. Mannan geasi almmuhii musihkkaskearru gillii man beaivválaččat eai huma nu olusat.
– Jus oanehaččat dadjat, de ii leat politihkka lávlagiin, ii ge árgabeaieallima birra, teavsttat leat baicce ráhkisvuođa iežamet lagasolbmuide, guovlluide ja čáppa sámeeatnamiidda, čilge CD-skearru sisdoalu Evvan Sapmelash.
Artista lei lávddi alde 2006:s dalle go son vuosttaš háve searvvai lávlungilvui sámi musihkkafestiválas Boazováris (Olenegorskas) Guoládatnjárggas mas oaččui vuosttašbálkkašumi. Čuojahii ge eará sámedoaluin sihke Guoládatnjárggas ja eará guovlluin Sámis.
2014:s beasai Evvan Sapmelash Sámi Grand Prix lávlungilvui lávlagiin «Mun dieđán mii vuoitit». Dat lávlla lea ge maid almmuhuvvon CD-skearrus.
– Lávlagiin, mainna serven Grand Prixii, lea jurdda ovttastahttit buot sápmelaččaid. Danin ge okta vearssa lávllun davvisámegillii.
«Sapmelash» sáni danin ge oaivvilda lei lunddolaš váldit atnui artistanamas.
(Ášši joatká gova vuolábealde:)
– Munnje deháleabbo iežamet kultuvra ja giella ovdalii stuorra auditoria
Evvan Sapmelash, Vasilij Maminov, lei 14-jahkásaš go čuojahišgođii gitárain. Álggus čuojahii dovddus Ruošša rocklávlagiid, dasto lei mielde smávva rockjoavkkus, muhto ii loga dainna lihkostuvvan nu bures.
Easka go oahppagođii gielddasámegiella de luovvanedje jurdagat.
– In leat obage čuojahan ja čállán makkár ge teavsttaid ovdal go ohppen giela. Ieš jurdda lávlugoahtit sámegillii lea boahtán maŋŋá Mari Boine ja Intrigue konsearttaid Lujávrris 2005:s.
Maminov easka rávisolmmožin oahpai gielddasámegiela go oinnii dan dehálažžan ja mávssolažžan. Jearaldahkii manin válljii gielddasámegiella ovdalii ruoššagiella man ipmirdit mihá eanet olbmot, vástida ná:
– Munnje lea deháleabbo iežamet kultuvra ja giella ovdalii stuorra auditoria.
Luonddus ja eamidis viežžá inspirašuvnna
CD-skearrus leat ovcci lávlaga, ja buot daid lávlagiid Evvan Sapmelash lea ieš čállán. Musihkkár ii loga sáhttit dadjat lea go váttis vai álkis bargu čállit teavsttaid ja bidjat šuoŋaid.
– Muhtumin manná hui johtilit, muhtumin lea gal viehka áddjás bargu. Dan barggus gal ii sáhte áigemeriid bidjat, čilge son. Ieš ge lasiha ahte luonddus ja eamidis viežžá Evvan Sápmelash inspirašuvnna.
– Leahkit luonddus, go oaidná, gullá ja vuoigŋá hui geahppasit. Gávpogis lea dan váttis dahkat. Gávpot lea dego geađgeseahkka mas leat dievva biillat ja olbmot mat jorret, vázzet orutkeahttá dego ulbmila haga. Danin luondu ja eamit leat mu inspirašuvnnat.
Sámiráđđi doarjjui ruđalaččat
CD-skearru, man sáhttá davvisámegillii jorgalit «Beaivi badjána», lea almmuhuvvon Sámiráđi ruđalaš doarjagiin.
– Almmuhit CD-skearru ámmátmusihkkastudios ii leat hálbi, muhto dán máilmmis leat buorit olbmot ja searvvit mat veahkehedje almmuhit CD.
Oahppat vuovdit musihka
Go jearran áigumušaid birra, de lohká Evvan Sapmelash ahte boahtt áiggis áiggošii báddet seamma lávlagiid, muhto ovttas joavkkuin ja oahppat vuovdit iežas musihka.
– Juste dál gal in vuovdde iežan musihka go in máhte, in dieđe mo dan dahkat, muhto beroštupmi gal lea jođihišgoahtit go muđui manin dat galgá, loahpaha son.
