Dat lea boađus Norgga ja Ruoŧa sámedikkiid ja Sámi Giellagáldu oktasaš prošeavttas.
– Mun lean ilus go julevsámegiella lea ožžon ođđa veahkkeneavvu. Dat mearkkaša olu giela ovdáneapmái čálalaččat. Dat lea ávkin olles julevsámegiellaservodahkii, dadjá Sámi Giellagáldu stivrajođiheaddji ja julevsámegiela lávdegotti jođiheaddji Per-Eric Kuoljok preassadieđu bokte.
Almmuhuvvon girji lea oaivvilduvvon buohkaide geat čállet julevsámegillii: studeanttaide, journalisttaide, jorgaleddjiide ja earáide geat beroštit julevsámegielas.
Girji almmuhuvvui Johkamohkis julevsámegiela seminára oktavuođas mii lea golggotmánu 2. ja 3. beaivvi. Dat lea vuosttaš dakkáraš girji gielas man hupmet sihke Norgga beale ja Ruoŧa beale Sámis.
– Dát girji lea hui buorre ovdamearka dasa manin normerenbargu sámi gielaid birra ferte dahkkot riikkaidrájáid rastá, dadjá Kuoljok.
Heivehuvvon
Girji lea heivehuvvon sihke Norgga ja Ruoŧa beale geavaheddjiide.
– Vaikko julevsámegiella lea seamma giella, de muhtun sániid čállinvuohki lea earálágan dan guovtti riikkas. Lohkki galgá máhttit dovdat iežas ja oažžut máŋggabealat lohkanvásáhusa. Dán girjjis lohkki oahpásmuvvá nubbi nuppi čállinárbevieruide ja sátneriggodahkii, daddjo preassadieđáhusas girjji birra.
Sámi Giellagáldu julevsámegiela lávdegoddi dagai maŋimuš rievdadusaid riektačállima oktavuođas árabut dán jagi, geassemánus.
Girji gávdno sihke fysalaš girjehámis ja maiddái elektrovnnalaš girjehámis. Eanet dieđuid dan birra leat Sámi Giellagáldu neahttasiidduin.
