-Almmuhus-
KULTUVRAAlmmu­heaba lávlaga mainna eaba beassan Sámi Grand Prix:i

Almmu­heaba lávlaga mainna eaba beassan Sámi Grand Prix:i

-

-

– Ii lean heađisge bahča go ean beassan mielde, dadjá DJ iDJa.

2021 čavčča lágidii Márkomeannu konseartta Bådådjos giellavahkku oktavuođas. Doppe lávllui earret eará 17-jahkásaš Inna Marja Amundsen. Markus Thonhaugen, dahje DJ iDJa, nu go su artistanamma lea, lei ges gehččiid gaskka okta sis guhte lei hirpmástuvvan Inna ovdanbuktimis. Maŋŋel konseartta finai DJ iDJa Inna ságain ja nu álggii sudno ovttasbargu. 

– Muhtin nissonolmmoš guhte lei maid gehččiid searvvis muitalii munnje ahte Inna lea mus fuolki, ja nu mun vulgen su ságaide. Moai gávnnaime vajot oktavuođa ja Inna leaikkastalai, eango moai searvva Sámi Grand Prix:i. Dalle lei vel mánnu dassá dieđihanáigemearri lei, ja jurddašin vel ahte dat ii mana. Muhto moai nagodeimme ráhkadit buktaga, dadjá Markus «DJ iDJa» Thonhaugen.

Vaikko leigga ovdal áigemeari sádden buktaga, de eaba beassan dainna viidáseappot. DJ iDJa muitala soai leigga vuosttaš várreoasseváldit; jus livčče gii nu geassádit, de leigga beassat mielde.

– Dán jagáš SGP:s lei alla dássi ja ii lean heađisge bahča go ean beassan mielde. Lea baicce hui somá go dál besse ieža almmuhit lávlaga, dadjá DJ iDJa.

DÁLVEIDJA cover, DJ iDJa ja Inna Marja Amundsen ođđa lávlla.
DÁLVEIDJA cover, DJ iDJa ja Inna Marja Amundsen ođđa lávlla.

Gáibideaddji lávlla

Ođđa šuoŋa namma lea «Dálveidja» ja almmuhuvvo duorastaga, geassemánu 9. beaivvi. DJ iDJa čilge šuoŋa gullat synthwave šáŋŋerii, mii sulastahttá disco musihka. 

– Inna mielas lea dát leamaš eanemus gáibideaddji lávlla maid lea lávlon, muitala Thonhaugen.

Buorre ovttasbargu

Go čakčat álggiiga bargat lávlagiin, de šattaiga hoahpus ráhkadit lávlaga. Inna Marja lea Lidaláttis Evenáššis eret ja Markus Thonhaugen, DJ iDJa, lea Hemnesas Helgelánddas eret. Danne go orruba iešguđet guovlluin, de šattaiga olu barggu čađahit digitálalaččat. DJ iDJa muitala soai leaba ožžon olu veahki su áhčis teakstačállimii. 

– Lei hui kreatiiva proseassa ráhkadit lávlaga. Moai šattaime Facebook ja e-poasttaid bokte gulahallat. «Dálveidja» ii leat juste namma geasselávlagis, muhto šuokŋa lea hui «fresh» ja jođán, nu ahte heive bures sihke dálvái ja geassái, muitala Markus Thonhaugen.

Niehku searvat SGP:i

Ávvir jearrá manne eaba leat seastán lávlaga boahtte jagáš Sámi Grand Prix:i ja DJ iDJa čilge ná:

– Artistan lea dehálaš almmuhit musihka jeavddalaččat. Sihke mun ja Inna ean leat almmuhan maidege guhkes áigái ja danne válljiime dál almmuhit lávlaga ovdalii go vuordit vel jagi boahtte Sámi Grand Prix:i. Dasa lassin ii lean makkárge dáhkádus ahte besse seamma lávlagiin boahtte jagi fas searvat.

Son maid muitala ahte sudnos leamaš hui buorre ovttasbargu ja jus vejolaš, de searvvašii fas boahtte jagi SGP:i.

– Mus goit lea hállu geahččalit searvat SGP:i fas, in dieđe maid Inna jurddaša, bohkosa Thonhaugen ja joatká:

– Mun han mátkkoštan olu mu musihkkabargguin ja deaivvadan olu ođđa olbmuiguin. In dieđe vuos šattan go Innain šat ovttasbargat vai geainna hal de, muhto áigi han čájeha geainna mun searvvašin fas.

Ávvir lea gulahallan Inna Marja Amundsenin, muhto son ii astan searvat jearahallamii dán háve.

-Almmuhus-