Ávvir almmuha ođđa oasi neahttasiiddus man namma lea «Nuorra Sámis». «Nuorra Sámis» lea ođđa áŋgiruššanprošeakta Ávviris mas gávdná sisdoalu nuoraide ja nuorrarávisolbmuide.
Ávvir ásaha sierra báikki nuoraide gos gávdná fáttáid mat gusket nuoraide. Áššit leat sihke čálalaš, podcasta ja video formáhtas, ja sisdoalu galgá álkit gávdnat avvir.no siiddus, go manná avvir.no siidui ja deaddila «Nuorra Sámis» boalu. Ulbmiljoavku leat nuorat ja nuorrarávisolbmot agis 16-35.
– Mun álgen siidduin bargat dán jagi. Lea leamaš guhkes proseassa gávdnat nuoraid miehtá Sámi, gullat fáttáid birra main sii beroštit, ságastallat, oažžut luohttámuša, ja lean ain bargame gávdnat ja ráhkadit birrasa. Ja dieđusge leat eará diŋggat maid prošeavttas, nu mo teknihkalaš oasit ja nu ain, muitala prošeaktajođiheaddji Sara Risten Susanna Gaup, gii lea bargan siidduin.
Jođánis geahčestanvuohki
– «Nuorra Sámis» gávdná sihke guhkibuš reportášaid, oanehis čállosiid, notiissaid, podcastaid ja videoid. Muhto podcastaiguin ja videoiguin eat álgge ovdal go maŋŋel geasseluomu. Fáttát galget leat feara mat. Sihke duođalaš fáttát, muhto maiddái somás fáttát, dadjá son.
– Sáhtán muitalit ahte vuosttaš ášši mii almmuhuvvo lea hui somás ášši ovtta dihto fáttá birra mas olu nuorat beroštit.
Son muitala ahte lea dehálaš guldalit lohkkiid. Gulahallat makkár fáttáin ja sisdoalus beroštit. Danin lea háleštan nuoraiguin ja nuorrarávisolbmuiguin miehtá Sámi.
– Muđui lean jurddašan ahte lea dehálaš hábmet čállosiid dan mielde ahte lea álki lohkat. Dán áigge lea mis dakkár jođánis geahčestanvuohki sosiála mediain, ahte mii massit beroštumi jođánit, nu ahte dan mielde lea dehálaš jurddašit go čállá áššiid. Muđui lea álo somá go herve áššiid olu govaiguin, dadjá son.
– Sosiála media, nu go mat TikTok, lea okta dain váldoplattfoarpmain mas nuoraid gávdná, seamma lea dieđus Snapchat ja vaikko Instagram maid. Daidda kanálaide livččii mihttu oččodit Nuorra Sámis, áŋgiruššan dihte nuoraid ja nuorrarávisolbmuid, dadjá Sara Risten Susanna.
Dáppe gávnnat ođđa nuoraidsiiddu.
Čađahan lohkkiidiskkademiid
– Dál ráhkada Ávvir ođassisdoalu nuoraid birra nu mo juo eará ođđasiid birra, ovdamearkka dihtii mii lea ođas ja maid nuorat leat olahan. Muhto Ávviris ii gávdno sierra áŋgiruššan mii dušše guoská nuoraide, sisdoalut main nuorat soitet beroštit, dadjá Sara Risten Susanna.
Ávvir čađaha maid lohkkiidiskkademiid, ja doppe leat ožžon signálaid ahte lohkkit váillahit sisdoalu nuoraide ja nuorrarávisolbmuide. Lohkkit váillahit maid mánáid sisdoalu ja Sara Risten Susanna muitala ahte dainna bargagoahtit maŋŋel geasseluomu.
– Lohkkiidiskkademiid mielde oaidnit ahte lea dehálaš. Mun ieš jurddašan man buorre fálaldat dat lea, ja čohkkedan jurddašit: Movt lea leahkit nuorran Sámis? Leat go olu earáláganvuođat sámi nuorain dáčča nuoraid ektui? Leat go olu nuorat geat áiggoše ovddidit ja searvat, muhto eai gávnna rievttes kanála Sámis? Ja leat go olu nuorat geat váillahit lohkat sámi nuoraid sisdoalu? loahpaha Sara Risten Susanna.
