– Ále čuovo mu, lávlu Mollet ođđa musihkkavideos man leat ikte almmuhan. (Geahča musihkkavideo vuolemusas áššis).
– Ále čuovo mu, lávlu Mollet ođđa musihkkavideos man leat ikte almmuhan. (Geahča musihkkavideo vuolemusas áššis).
Mollet joavku, Gironis eret, lea almmuhan musihkkavideo man leat ráhkadan «Ale čuovo mu» lávlagii.
Lávlla lea rockelávlla, ja musihkkavideos lea sevdnjes biras ja dušše okta čuovga.
Čuovggas lihkada lávlu Per Josef Idivuoma ja lávlu, ja joavkku lahtut maid lávlot osiid.
– Mii háliideimmet dahkat filmma vehá nuppeládje go dat mii lea dábálaš, ja ráhkadit dakkár filmma mas lea vuollegis tempo, muitala Samuel Idivuoma Ávvirii.
Olusat geahččan jo
Video oidno eanemusat čájehuvvon Facebookas, ja olbmot leat geahččan badjelaš 1800 geardde musihkkavideobihtá.
Mollet lea maid almmuhan dan seamma musihkkavideo Youtubas, muhto doppe eai leat nu gallis fuobmán geahččat filmma.
– Sávvamis oažžut vehá fuomášumi dáinna musihkkavideoin dál go galgát čuojahit Kárášjogas beassášlávvordaga, lohká Idivuoma ja illosa go gullá ahte ollugat leat oaidnán filmma sosiála mediain, go ii leat ieš šaddan čuovvut mielde go lea boazomeahcis juste dál.
Per-Josef Idivuoma lea Mollet joavkku váldolávlu. Eará joavkolahtut maid lávlot suinna osiin ovttas.
Raoul Härmä čuojaha el-gitára, Samuel Idivuoma dearpá rumbbuid, Magnus Utsi čuojaha akustihkalaš gitára ja Daniel Krigare čuojaha bássa.
