– Mii háliidit addit juoidá ruovttuluotta min lohkkiide, ja bovdet iluin buot min lohkkiid ávvukonsertii borgemánus, lohká váldodoaimmaheaddji Kari Lisbeth Hermansen.
– Mii háliidit addit juoidá ruovttuluotta min lohkkiide, ja bovdet iluin buot min lohkkiid ávvukonsertii borgemánus, lohká váldodoaimmaheaddji Kari Lisbeth Hermansen.
Lea logi jagi áigi go Ávvir ilbmagođii, ja «riegádii» guovvamánu 6. beaivvi 2008:s. Vuosttaš jahkebeali almmuhuvvui aviisa dušše golmma geardde vahkkus.
– Mis lea dat stuora ávvudeapmi borgemánus, dan dihte go borgemánu 12. beaivvi 2008 rájes lea Ávvir almmuhuvvon viđa geardde vahkkus. Guhkes áigge bargu lei de addán bohtosiid ja niehku nammasuvvui, namalassii ahte sámi álbmot oaččui vuosttaš geardde beaivválaš aviissa sámegillii, lohká Ávvira váldodoaimmaheaddji, Kari Lisbeth Hermansen ja lohká leat Ávvira lohkkiid gudni go dál beassat ávvudit aviissa logi jagi beaivvi.
Gávcci artistta
Ávvir 10 jagi ávvukonsearta lágiduvvo Guovdageainnus borgemánu 24.beaivvi,
ovttas Thon Hotel Kautokeino.
– Mii álggahit ávvudeami veaigekonsearttain ja loahpahit eahketkonsearttain. Ávvukonsertii lávddi alde galget veaiggi ja eahkeda mielde lávket gávcci sámi artistta/juoigi ja joavkku. Mii sávvat ahte konseartaprográmmas lea juoga juohke ovtta miela mielde, lohká váldodoaimmaheaddji gii illuda dađistaga ain almmuhit artisttaid.
Veaigekonsearta lea nuvttá buot abonneanttaide.
Sámi Grand Prix vuoitit
Ávvir sáhttá dál juo muitalit ahte dán jagáš Sámi Grand Prix vuoitit, Inger Karoline Gaup ja Hans Ole Eira, leaba artisttaid gaskkas geat dán eahkeda leat lávddis.
– Lea hui somá searvat, ja orro munnje riekta leat mielde dás go lea min aviisa. Ávvir lea mearkkašan ollu munnje ja láven geahččat ain mii dál dáhpáhuvvá Ávviris, lohká ávvudoaluid artista Hans Ole Eira.
Ovdal konseartta bovdejit lohkkiid searvat «liekkadandoaluide» stuora lávvui olggobealde hotealla. Doppe lágidit iešguđetlágán gilvvuid ja fállet herskkuid.
Nuoramus lohkkiide ođđa bargi
– Nuoramusat sáhttet maid illudit deaivvadit aviissa «ođđa bargiin», gii borgemánu rájes galgá buvttadit sisdoalu min nuoramus lohkkiide, muitala Hermansen, iige hálit vuos duođi eambbo muitalit juste dan birra.
Njuolggosáttan
Abonneanttain geain ii leat vejolašvuohta boahtit konsertii, bovdejuvvojit čuovvut doaluid njuolggosáddagis mii sáddejuvvo avvir.no siiddus. Konsertii leat maid vejolaš oastit bileahta.
Lágideaddjit sihtet olbmuid čuovvut mielde Facebookas gos almmuhit eambbo dieđuid doaluid birra ja makkár artistat dán eahkeda galget lávddi ala.
Vuorbádit bileahta konsertii
Ávvudeapmi loahpahuvvo eahketkonsearttain mii lágiduvvo ovttas Thon Hotel Kautokeino.
Eahkeda váldoartistta almmuhuvvo Facebookas fargga. Čuovo mielde «Ávvir 10 jagi ávvukonsearta / Ávvirs 10 års jubileumskonsert» siiddus, dieđiha lágideaddji preassadieđáhusas ja muitala ahte dán konsertii sáhttet 20:s abonneanttain vuoitit bileahtaid.
Sáhttet searvat gilvvuide
Ávvir lea válljen lágidit doaluid Guovdageainnus.
– Dán háve heivii vuohkkasepmosit lágidit doaluid Guovdageainnus, go doppe lei ovttasbargoguoibmi, Thon Hotealla, geaidda heivii minguin ovttas lágidit doaluid. Mii han leat vuosttažettiin aviisa, eat ge leat hárjánan konsearttaid lágidit, nu ahte dása dárbbašeimmet veahki, čilge Ávvira neahttadoaimmaheaddji Berit Marie Lise Eira.
Nuvttá abonneanttaide
Son dattege deattuha ahte konseartta lea vejolaš oaidnit avvir.no njuolggosáddagis mii čájehuvvo neahttasiiddus, ja nu besset maiddái sii geahččat konseartta geat eai joavdda Guovdageidnui dan beaivvi.
– Dat lea nuvttá buot min abonneanttaide, ja mun ávžžuhan ge sin geat dollet Ávvira ja ožžot dan poastakássii, maiddái ordnet alcceseaset geavaheaddji min neahttasiidui, vai leat gergosat geahččat konseartta borgemánus, lohká Eira.
Neahttadoaimmaheaddji datte sávvá nu olusiid go vejolaš boahtit konseartabáikái gos olbmot maiddái besset searvat gilvvuide ja vásihit dáhpáhusaid maid muđuid ii sáhte.
– Mii leat geahččalan heivehit prográmma nu ahte dat heive sihke min nuorat ja vuorraset lohkkide ja illudat ávvudit ovttas singuin, loahpaha neahttadoaimmaheaddji Eira.