-Almmuhus-
KULTUVRAAlmmuha vel ovtta jiellatjoavkku

Almmuha vel ovtta jiellatjoavkku

-

-

Márkomeannu almmuha vel ovtta jiellatjoavkku dán jagáš festiválii. Arvvas lea váldojuvvon váimmolaččat vuostá konseartalávddiin miehtá Europa, ja dál de viimmat sáhttá sin oaidnit ruovttušiljus.

– Midjiide lea dego Arvasa oažžut ruoktut. Dá lea joavku mainna mis lea persovnnalaš gaskavuohta ja šaddá buorre viimmat beassat gullat sin čuojahit ruovttuguovlluin, moddjá buvttadeaddji Susanne Amalie Langstrand-Andersen, ja geažádallá dasa ahte juoigi Sara Marielle Gaup Beaska lea Kvernmos Rivttagis eret.

Ovttas bássačuojaheddjiin/lávluin Steinar Raknesain dagaheaba soai dábálaččat joavkku Arvvas, ja Márkomennui váldiba vel fárrui perkušonistta Erland Dahlen.

 

Luohti seaguhuvvon americanain

Arvvas lea dovddusin šaddan jietnagovain mii diktá luođi seaguhuvvot americanain, bluesain, rockain ja popain. Vuosttaš skearru riegádii dan bokte ahte jietnafiillat sáddejuvvojedje ovdan ruoktut gaskal Argentina ja Deanu, ja dalle gal ii leat imaš go šattai nu erenoamán šáŋŋerseaguhus.

– Lea beaggán ahte Arvvas bidjá leavttu guldaleddjiide, mii sávvat don leat gearggus dánsut, ávvudit ja gieđaid speažžut, loahpaha Márkomeanu buvttadeaddji preassadieđáhusastis.

 

Márkomeannu lágiduvvo suoidnemánu 28.-31. b. dán jagi, ja miessemánu loahpas almmuhuvvo olles prográmma dán jagáš festiválii.

Artisttat mat dássážii leat almmuhuvvon festiválii leat Norgga MGP-doaivva Agnete, ÁGY, Marja Mortensson ja Ravggon.

-Almmuhus-