Sámi šamána háliida boktit stuorát dihtomiela olbmuin, ja maid buktit sámi noaidevuođa olbmuide vai ožžot čoavdagiid ieža rahpat geainnu iežaset váibmui.
Deatnulaš Astrid Ingebjørg Swart lea ráhkadan ofelaškoarttaid nuppi veršuvnna. Preassadieđáhusas čilge ahte čiekŋudankoarttat veahkehit rahpat viidáset dasa mii lea čihkkon min beaivválaš dihtomielas.
– Vuosttaš duhát deaddileami leat juo vuvdon, ja lean hirpmáhuvvan ja giitevaš go leat nu bures váldon vuostá, dadjá son. Dát koarttat leat jorgaluvvon sihke duiskagillii ja eŋgelasgillii.
Son sávvá ahte nu olusat go vejolaš ožžot seamma ilu nuppi veršuvnnain go vuosttaš veršuvnnain su sáttasániin ja ahte ožžot veahki duohtan dahkat iežaset potensiála.
– Lea muhtinlágan vuoiŋŋalaš fápmu mii lea veahkehan duohtan dahkat prošeavtta, son čállá.
Sáráhkká koarttaid lea son ráhkadan ovttas Margit Bergain, gii lea málen govaid.
