-Almmuhus-
OĐĐASATAlmmuha nuppi lávlaga ođđa skearrus

Almmuha nuppi lávlaga ođđa skearrus

-

-

Sámi artistta Elin Kåven lea almmuhan ođđa lávlaga ja video, mas fáddá lea gullevašvuođadovddut lundui.

Sámi artistta Elin Kåven lea otne almmuhan iežas nuppi singela iežas ođđa skearrus ”Eamiritni- Rimeborn” mii almmuhuvvo Davviriikkain guovvamánus boahtte jagi.

Singela namma lea Hiras, mii mearkkaša udju, ja govve mo lea leat nu hiras ja hearki ahte ii luohte geasage, iige vel ii alcces ge. Dat govvida identitehta, osku, gullevašvuođa- ja daid jávkama birra.

– Lean máŋgii leamaš dakkár dilálašvuođas gos lean dovdan nu balus ja hearkin ahte in leat dovdan gullevašvuođa gosage, in alccen ge. Dat lea hui balddihahtii dovdu, go olmmoš šaddá issoras dorvvuheapme iežas birrasa ektui, lohká Elin Kåven.

 

Čirrui go oinnii video

Áltálaš dokumentárafilbmadahkki Kristin Nicolaysen lea ráhkadan musihkkavideo dán lávlagii, mii govvida ohcama gullevašvuhtii sihke luonddus ja gávpogis.

– Mun lean ohcalan eanet ja eanet ruovttoluotta lundui daid maŋemus jagiid, ja dat video čájeha justte dan. Dovddan eanet ja eanet gullevašvuođa lundui, ja dovddan dávjá ahte gaskka gávpoteallima ja eallima luonddus gaskkal šaddá stuorát ja stuorát, muhto mun dárbbašan goappešegáid eallimis. Mun čirrojin go Kristin vuohččan čájehii munnje musihkkavideo, danne go dat muitala juste maid mun háliidin oažžut ovdan das, lohká Elin Kåven.

 

 

-Almmuhus-