Sámi artista Kajsa Balto mielas váilot sámi juovlalávlagat, ja danin lea ge ráhkadan ođđa skearru «Sámi juovllat – Sámi christmas». Vuosttaš šuokŋa ilbmá jo bearjadaga.
– Mun lean olu jagiid ohcalan eanet sámi juovlamusihka. Juohke jagi han almmuhuvvojit ođđa juovlašuoŋat sihke dárogillii, ođđadárogillii ja eŋgelasgillii, muhto sámegillii gal ilbmet hárve. Danin lean ieš váldán ovddasvástádusa ja ráhkadan juovlaskearru, lohká Balto.
«Sámi juovllat –Sámi christmas» ilbmá skábmamánu 19. beaivvi. Dán skearrus leat ođđa juovlalávlagat, árbevirolaš sámi juovlalávlagat ja dovddus juovlalávlagat mat leat jorgaluvvon sámegillii.
Vuosttaš šuokŋa, «Stuorámus skeaŋka» ilbmá jo golggotmánu 29. beaivvi ja dán lea Kajsa Balto ieš čállán.
– Teavsttas lávllun ahte illuluođit skájaidit, mii ávvudit stuorámus skeaŋkka eatnamis. Dát sáhttá leat vaikke mii, soaitá mánná man lea riegádahttán, bearaš, ustibat, dearvvašvuohta, biebmu, luondu, ráfi, oadjebasvuohta dahje jo olles eallin. Dan ferte juohkehaš ieš dulkot, lohká son.
