Almmáiolmmoš áššáiduhtton viđa veagalváldima ovddas Divttasvuonas

Politiijat válde gitta muhtin viđátlot-jahkásaš albmá juovlamánu 6. beaivvi Beardogoržžis.

Beaivvi maŋŋil mearridii Salten diggegoddi bidjat albmá háldogiddagassii njealji vahkkui, guokte vahkku galgá ollásit isolašuvnnas.

Dán dahket go ballet duođaštusaid sáhttit jávkat.

Vuosttaš

Almmái lea áššáiduhtton viđa veagalváldima ovddas, dasa lassin leat guokte dáhpáhusa go galgá leat verrošan virggis, luohttámuš- ja sorjjasvuođadilis.

– Dát lea vuosttaš guhte váldo gitta dan nu gohčoduvvon Divttasvuona-áššis, lohká politiijaadvokáhta Stig Morten Løkkebakken, Nordlándda politiijaguovllus NRK:ii.

Hástaleaddji dutkan

Áššáiduhtton almmái ássá Divttasvuonas.

Áššis leat njeallje gillájeaddji, buohkat leat nissonolbmot, sii leat dál gaskkal 18 ja 81 jahkásaččat.

Nuoramus lei vuollel 14-jahkásaš go rohcošeamit galget leat dáhpáhuvvan, dieđihit politiijat.

Politiijat lohket ahte áššis sáhttet leat eambbo gillájeaddjit.

– Dát lea hástaleaddji dutkan go dás lea sáhka dáhpáhusain mat leat dáhpáhuvvan jahkeviissaid, ja mat leat oalle áigá dáhpáhuvvan. Politiijain ii leat ágga jáhkkit ahte dán konkrehta áššis leat eambbo vearredahkkit, muhto dain eará áššin mat gullet Divttasvuona-kompleksii, sáhttit maid gártat olbmuid váldit gitta, lohká Løkkebakken.

Lagabui 30 gillájeaddji

Divttasvuona-ášši jorragođii geassemánus, maŋŋil go 11 divttasvuotnalaš nissona ja albmá, VG bokte muitaledje iežaset vásihan rohcošemiid.

Áššiin mat leat dutkama vuolde, lea sáhka sihke mánáid ja ollesolbmuid veagalváldimiin, seksuála ovttastallamis mánáiguin geat leat vuolle 14-jahkásaččat ja seksuála illástemiin mat leat dahkkon ámmáha dahje luohttámušdoaimma boastut geavaheami bokte.

Dán rádjai lea sáhka birrasiid 27 gillájeaddjis ja 38 vearredahkkis, dieđihit politiijat.

Lassin rohcošanáššiide, leat maid registreren golbma ášši mas lea sáhka áitagiin ja ovtta ášši mas lea sáhka olbmuid geatnegasvuođas hehttet lobihis daguid.

(©NTB)