50- jahkásaš almmái lea dubmehallan Nuorta-Finnmárkku diggegottis go lea veagalváldán nissona. Son dubmehallo maid go lea olbmuid gávppašan ja go lea čállán behtolaš báhpáriid.
50-jahkásaš almmái galgá čohkkát vihtta jagi ja gávcci mánu giddagasas. Son lea dubmehallan go lea veagalváldán ja seksuálalaččat illastan 20-jahkášas olgoriikkalaš nissona.
Sudno oktavuohta álggi interneahtas ja almmái siđai nissona boahtit Norgii. Almmái lea bággen nissona bargat bargošiehtadusa ja bálkká haga boradanbáikkis. Son lea maid šaddan bargat ruovttubargguid albmá dálus, nu čállo duomus.
– Nisson ii hálddašan giela, sus ii lean fierpmádat ja máhttu Norgga riikka dili birra. Ja son leai maid sorjavaš dan dievdoolbmui gos orui ja oaččui borramuša. Dát oktavuohta lei gaskal borgemánu ja čakčamánu 2018.
Almmái šaddá dal máksit 175.000 ruvnna buhtadussan nissonii ja vel 25.000 go lea massán dietnasa. Almmái lea maid dubmejuvvon go lea čállán behtolaš báhpáriid. Son lea maid gildon váldimis oktavuođa nissoniin. Nu čállá NTB.
