Dán vahkkoloahpa čoahkkanit spábbačiekčit miehtá Sámi Jiellevárrái, Ruoŧas, Allhelgorna-spábbačiekčamiidda.
30 jagi leat sámi spábbačiekčit vuolgán Jiellevárrái čiekčat spáppa go leat Allhelgorna-spábbačiekčandoalut.
Dán jagi eai leat nu máŋga joavkku searvan go dábálaččat lávejit.
Oktiibuot leat 13 joavkku searvan, vihtta nissonjoavkku ja gávcci dievdojoavkku.
– Dát spábbačiekčamat leat hui dehálaččat go leat juo čikčon 30 jagi dáppe Jielleváris, ja lea šaddan dehálaš kultuvra-, deaivvadan- ja valáštallandeaivvadeapmi, muitala spábbačiekčama lágiideaddji Carola Johansson. (Gällivare sameförening)
Gárrenmirkkot ja spábbačiekčan
Sverigesradioi lea Allhelgorna-spábbačiekčamiid lágiideddjiide muitalan dán jagi ii šatta dánsa maŋŋel spábbačiekčamiid, nu movt ovdal lea leamašan.
Ággan dasa lea go láve leat nu olu moivi dánssa dihtii ja media de čállá dáid áššiid birra.
– Valáštallan ja gárrenmirkkot eai gula oktii. Allhelgorna-spábbačiekčan lea deaivvadanbáiki, ja mun illudan oaidnit buohkaid geat bohtet spábbačiekčamiidda, muitala Johansson.
Spábbačiekčamat álget lávvordaga, skábmamánu 4. beaivvi, diibmu ovccis, Jielleváris.
