-Almmuhus-
OĐĐASAT– Allet juga nu ollu beassážiid

– Allet juga nu ollu beassážiid

-

-

 Av-og-til organisašuvdna ávžžuha váhnemiid ja eará rávisolbmuid jurdilit man ollu alkohola sii juhket go mánát leat lahkosis.

– Divrras viina ii daga beassážiid buorebun dahje suohttaseabbon mánáide, lohká Av-og-til organisašuvnna jođiheaddji Randi Hagen Eriksrud.

Son háliida muittuhit ahte dán jagáš beassážat leat earenoamážat. 

– Garra koronanjuolggadusat ja njoammuneastadannjuolggadusat leat čuohcan olu mánáide ja nuoraide. Danne lea hirbmat dehálaš ahte beassážat šaddet fiinna ja oadjebas basit sihke mánáide ja rávisolbmuide. Ollu alkoholajuhkan billista dan, dadjá Eriksrud. 

Oadjebas váhnemat

Oallugat vásihit ahte moadde vuolaláse dahje viidnaláse juhkat lea oassin beassášnaffámis. Av-og-til jođiheaddji ávžžuha váhnemiid ja eará rávisolbmuid juhkat eanet alkoholakeahtes juhkosiid beassážiid oktavuođas.

– Ovtta viidnaláse dahje ovtta vuollaga juhkat, sáhttá leat njálggat. Muhto seammás mii diehtit ahte mánat vuhttet go rávisolbmot leat juhkan eambbo go dušše dan, ovdal go mii ieža ge fuobmát dan. Dat addá dorvvohisvuođa mánáide go vásihit ahte rávisolbmot rivdet, ja mánát eai háliit ahte váhnemiid láhttenmálle galgá rievdat, lohká Randi Hagen Eriksrud preassadieđáhusas.

-Almmuhus-