Maŋŋebárgga lei bohccebuollin Kárášjogas, dás logat mo garvvát dien dili.
Maŋŋebárgga lei bohccebuollin Kárášjogas, dás logat mo garvvát dien dili.
Maŋŋebárgga eahkeda birrasii diibmu 19:00, ožžo politiijat dieđu ahte Kárášjogas lei muhtin stobus buollán bohcci. Buollin lei Ráđđeviessogeainnus, ja báikkis fitne politiijat, ambulánsa ja guokte buollinčáskadanbiilla.
– Mii oaččuimet dieđu buollima birra, ja go joavddaimet deike, de čájehuvvui ahte stobus lea suovvabohcci buollimin ja dan gal jáhkán buollinčáskadeddjiid čáskadit oalle jođánit, muitalii Robin Lindeberg Kárášjoga politiijaid bealis.
Ii oktage roasmmehuvvan
Lindeberg lohká leat dábálažžan ahte buot heahteveahkit fitnet báikkis go ožžot dieđuid buollimiid birra. Dán vuoru ii lean go bohccebuollin iige dáhpáhusas roasmmehuvvan oktage.
Maŋŋebárgga eahkeda, go dát dáhpáhuvai, lei oalle buolaš Kárášjogas. 25 buolašgrádas dat buollinčáskadeaddjit čáskadedje buollima.
Ádjánedje čáskadit
Kárášjoga gieldda buollinsuodjalushoavda Alf Isaksen muitala buollinčáskadeddjiid guhká ádjánan čáskadit dola.
– Bohcci lei buollán máŋga mehtera vuolábealde bohccegeaže, danne ádjánedje, čilge son.
Isaksen ávžžuha ge olbmuid dalánaga dieđihit buollinčáskadeddjiide jus vávjet maidege dola boalddedettiin, go lohká sáhttit leat menddo maŋŋit dalle easka dieđihit go lea jo buollán.
– Bohccebuollima sáhttá vávjit máŋgga ládje, hui dávjá álget bohccis gullot ártegis jienat, roašká dahje sáhttá njurgugoahtit. Muhtumin ges jaskkoda oalát, dat sáhttá mearkan das ahte bohcci lea lahka buollámin. Dasa lassin bohcci maid lieggana, čilge son.
Rávvagat
Buolašin olbmot dolastallet vai stobut bissot liekkasin, muhto buollinsuodjalushoavddas leat rávvagat olbmuide.
– Vaikke lea buolaš de ii galgga menddo olu muoraid coggat uvdnii, iige boaldit nu garrasit ahte uvdna ruvssoda ja bohcci lieggana, čilge Isaksen. Son lohká bohccebuollimiid vuolgit máŋgga sivas.
– Dat lea das gitta ahte lea go bohcci ruhttejuvvon, lea go njuoska- vai goikemuoraid boaldán ja lea go plasttetbázáhusaid ja báberkássaid boaldán. Erenoamážit báberkássaid ii galggaše boaldit go dat sáhttet darvánit bohccái, čilge Isaksen.
Njuoska- ja goikemuoraid erohusa čilge ges ná:
– Jus njuoskamuoraid boaldá, de šaddá uvnna sisa lievla, dát fas darvána bohccái mii de skártu ja jođáneappot sáhttá buollát. Goikemuorain šaddá ges geahppasat suovva mii álkit beassá bohcceráigge áibmui.
Olusat meddet
Isaksen lohká maid leat dehálažžan iskat lea go muorrauvdna čavddis, dasa lassin lohká vel leat ovtta meattáhusa man eatnašat dahket, muhto mii sáhttá leat hui váralaš:
– Olusat giddejit uvnna ventiillaid go de dolla lea buollán, dáinna lágiin geahččalit seastit muoraid ja bisuhit lieggasa guhkit. Muhto dan ii galggaše dahkat, dolla galggašii oažžut doarvái áimmu vai bohcci ii skártto.
