Boahtte jagi rájes galget buot bussiin ja smávit bussiin alkolohkat.
Boahtte jagi rájes galget buot bussiin ja smávit bussiin alkolohkat.
Ođđajagemánu 1. beaivvi 2019:s galget buot Norgga bussiin ja smávit bussiin, mat vudjet mávssu ovddas, alkolohkat.
– Bussevuddjiin lea erenoamáš ovddasvástádus áimmahuššat mátkkálaččaid ja birrasa sihkkarvuođa. Geatnegahttojuvvon alkolohkka buoreda olbmuid oadjebasvuođa, dadjá johtolatministtar Ketil Solvik-Olsen preassadieđáhusas.
Unnán promilla
Olu bussefitnodagat ja eará sáhttofitnodagat leat jo ovdalaččas bijahan alkolohkaid vuodjinfievrruide buoredan dihtii johtolatsihkkarvuođa.
– Fitnodagat leat eaktodáhtolaččat bijahan alkolohkaid. Dál gáibidit earáid maid čuovvolit. Norggas vudjet lihkus unnán ámmátvuoddjit gárrenoaivvis, muhto dattetge lea dehálaš dán eastadit go promillavuodjimis sáhttet stuora váikkuhusat mátkkálaččaide, lohká Solvik-Olsen.
5 jagi
Alkolohkka gáibiduvvo vuos Norgga bussiin ja smávit bussiin mat vuojihit olbmuid mávssu ovddas.
Rievdadanáigodat bistá vihtta jagi, dat mearkkaša ahte sáhttofitnodagat galget dán áigodaga siskkabealde bijahit alkolohkaid.
Boahtte áiggis sáhttet maiddái eará sáhttofitnodagat, dego ovdamearkka dihtii droššebiillat geatnegahttot bijahit vuodjinfievrruide alkolohka.
