Gaskamearálaččat lea juohke norgalaš gávppašan 7,2 lihttera alkohola vuosttaš jahkebealis, mii lea 1,3 proseantta unnit go diibmá. Oslo lea bajimuš listtuin gos eanemusat gávppašuvvo Vinmonopolas.
Oslo lea fylka gos vuovdin Vinmonopolas lea alimus. Dássážii lea juohke Oslo-ássi gaskamearálaččat gávppašan 8,8 lihtter alkohola polas.
Gaskkal ođđajagimánu ja geassemánu lea oaivegávpogis oktiibuot vuvdon 5,9 miljovnna lihttera alkohola Vinmonopola oalgefitnodagain.
Akershusas lea seamma áigodagas vuvdon 4,7 miljovnna lihttera.
Dakka maŋis boahtá Hordaland gos lea vuvdon 3,8 miljovnna ja Rogalánddas ges 3,3 miljovnna.
Finnmárkku ássit juhket nubbin eanemusat
Vuolimusas Vinmonopola vuovdinlisttus gávdnat Finnmárkku, ja doppe lea vuvdon 500.000 lihtter.
Aŋkke leat Finnmárkku ássit gaskamearálaččat gávppašan 8,3 lihttera. Dat lea nubbin eanemus maid juohke ássi lea gávppašan buot 18 fylkkain.
Juohke ássái lea vuvdon unnimusat Østfoldas, ja gaskamearálaččat lea vuvdon dušše 4,3 lihttera.
Vuosttaš jahkebealis lea Vinmonopola vuovdán 38,2 miljovnna lihttera alkohola riikkadásis, mii lea 1,3 proseanta unnit go diibmá.
(©NTB)
