– Dat mii rávisolbmuid mielas orru leamen somá sáhttá mánáide leahkit sihke balddihahtii ja ahkit, lohká Av-og-til organisašuvnna generálačálli Randi Hagen Eriksrud.
Koronapandemiija váikkuha maiddái juovllaid dán jagi, ja ollu mánát galget juovllaid ávvudit dušše lagamus ovddasteddjiiguin ja bearrašiin. Av-og-til organisašuvnna generálačálli bivdá olbmuid leahkit áicilin, ja čuovvut mielde leat go birrasis mánát geat eai oro leat oadjebasat ruovttuineaset.
– Ollu mánát galget dađi bahábut juovllaid áigge vásihit váhnemiid geat juhket beare ollu alkohola, lohká Eriksrud preassadieđáhusas.
Jus vávjá maidege
Son deattuha ahte leat máŋga vejolašvuođa maid galgá dahkat jus ballá ahte muhtun mánás ii leat buorre dilli ruovttus.
– Oallugiid mielas lea váttis dahkat juoidá, go ii riekta dieđe maid galgá dahkat. Deháleamos lea ahte dagat juoidá jus orut gamus dovdame ahte juoga lea boastut. Riŋges Facetime bokte, sáddes teakstadieđu, ja čájet ahte beroštat. Ale mahkaluša, váldde oktavuođa mánáid ja nuoraid alárbmatelefovnnain jus dárbbašat ráđiid oažžut movt gieđahallat mánáid dili. Alárbmatelefonnummár lea 116 111, lohká Eriksrud.
Preassadieđáhusas boahtá ovdan ahte iskkadeapmi, man Ipsos lea dahkan Av-og-til organisašuvnna ovddas, čájeha ahte Romssas ja Finnmárkkus oaivvildit 57 proseantta ahte juovllaid áigge juhket olbmot beare ollu alkohola seammás go mánát leat lahkosis.
