Norgga eanadoallo- ja biebmoministtar deaivvadii sávzaealáhusain diehtojuohkinčoahkkimis alitnjuovččadávdda birra.
– Lea duođalaš dilli, ja munnje lea dehálaš dađistaga oažžut maŋemus dieđuid Biebmobearráigeahčus, danne go sii dat gieđahallet alitnjuovččadávdda, dadjá eanadoallo- ja biebmoministtar Geir Pollestad.
Mánnodaga čakčamánu 23. beaivvi lei Pollestad diehtojuohkinčoahkkimis ealáhusain, Biebmobearráigeahčuin ja Veterinearainstituhtain gos oaččui maŋemus dieđuid alitnjuovččadávdda birra.
Ii leamaš 2009 rájes
Čakčamánu 6. beaivvi fuomášuvvui alitnjuovččadávda sávzzain Agderis. Dan ovdal ii leat registrerejuvvon virusdávda Norggas 2009 rájes. Alitnjuovččadávda lea maiddái registrerejuvvon sávzzain Rogalánddas.
– Dan mii váldit duođas departemeanttas. Boanddaide dagaha dat eahpesihkarvuođa ja balu, lohká Pollestad.
Alitnjuovččadávda lea virus, mii vuosttažettiin njoammu sávzzaide ja gussaelliide, muhto dávda sáhttá njoammut maiddái eará smirezasti elliide, nu go gáiccaide, sarvvaelliide, kamelaide ja lámáide.
Dávda nuppástuvvá , ja njoammu varranjammi divrri bokte, mii gohčoduvvo hihtehin. Alitnjuovččadávda ii njoamo njuolga elliid gaskka. Alitnjuovččadávda ii njoamo olbmuide, ii oktavuođas elliiguin, ii ge biepmu bokte.
Danmárkkus ja Ruoŧas leat maiddái maŋemus áiggi registreren alitnjuovččadávdda, ja nu maid eará riikkain Eurohpás. Nu čállá Eanadoallo- ja biebmodepartemeanta departemeantta neahttasiiddus.
