– Alit árvu Gáldui

Go 2017 stáhtabušeahtta almmuhuvvui odne, de ii leat Gieldda- ja ođasmahttindepartemeantta juolludan ruđaid Gáldu álgoálbmot vuoigatvuođa gealboguovddážii.

Dás rájes oainnat ruhtada Stuoradiggi Gáldu.

– Gáldu šaddá ođđajagi rájes oassin Norgga našunála olmmošvuoigatvuođaguovddážis. Dá lea midjiide stuora beaivi, ja bealistan lean hui ilus go Norga duostá ja sihtá nannet álgoálbmot rivttiid, lohká Gáldu direktevra Laila Susanne Vars.

Son lea golbma jagi bargan dan nammii ahte Gáldu beasašii Stuoradikki háldui.

Vákšugohtet ja guorahallagohtet

Norgga našunála olmmošvuoigatvuođaguovddáža bargu lea ovddidit ja suddjet olmmošvuoigatvuođaid Norgga vuođđolága, olmmošvuoigatvuođalága ja eará lágaid hárrái.

Gáldu lea dássážii doaibman diehtojuohkin gealboguovddážin, dál rievdá sin mandáhta.

– Dál beassat maiddái guorahallat ja vákšut sámiid ja eará Norgga unnitlogu álbmogiid rivttiid. Mii hirbmadit illudit go beassat oassin nanu fágasuorggis, lohká Vars.

Ovdáneapmi ja alit árvu

Gáldu direktevra lea rámis go šaddet oassin dehálaš institušuvnnas ja son illuda go sin gelbbolašvuođa atnet ávkin.

– Fágalaš ovdáneapmi lea stuorámus buorrin beassat oassin Norgga našunála olmmošvuoigatvuođaguovddážis, dál bidjo eanet deaddu min cealkámušaide mo nannet ja čađahit olmmošvuoigatvuođaid. Gáldu oažžu maid alit árvvu go beassat gozihit olmmošvuoigatvuođaid, lohká Laila Susanne Vars.

Jáhkká vuoruhuvvot ruđalaččat boahtte jagi

Norgga našunála olmmošvuoigatvuođaguovddáš ásahuvvui diibmá ja gullá Stuoradikki vuollái.

Gáldu direktevra muitala sin danin jávkat stáhtabušeahta oktavuođas go šaddá Stuoradikki ovddasvástádus ruhtadit Gáldu doaimma ja guhtta bargi.

– Mun in dieđe mo Stuoradiggi ruhtada iežas ásahusaid, muhto árvidan ahte vuoruhit Norgga našunála olmmošvuoigatvuođaguovddáža ja ahte sis lea dáhtu doalahit ásahusa barggu. In bala goit ahte eat vuoruhuva, loahpaha Vars.