-Almmuhus-
-Almmuhus-
-Almmuhus-
OĐĐASAT– Álgoálbmotvuoigatvuođat fertejit vuhtii váldot Parisas

– Álgoálbmotvuoigatvuođat fertejit vuhtii váldot Parisas

-

-

Aili Keskitalo beasai ikte doallat sáhkavuoru COP21 dálkkádatkonferánssas. Doppe son deattuhii ahte lea dehálaš álgoálbmotvuoigatvuođaid oažžut šiehtadussii.

Sámediggepresideanta Aili Keskitalo gáibida ahte dálkkádatšiehtadallamiin Parisas galget boahtit cealkámušat main leat geatnegahtti strategiijat olmmošvuoigatvuođaid ja álgoálbmotvuoigatvuođaid hárrái.

– Dálkkádatrievdamat čuhcet garrasepmosit buot olbmuid vuođđovuoigatvuođaide, lohká Keskitalo Sámedikki preassadieđáhusa bokte.

 

Beasai sárdnidit

Aili Keskitalos lei sáhkavuorru ON dálkkádatkonferánssas Parisas ikte, doppe son ákkastalai ahte stuorra, globála dálkkádatrievdamat dál jo uhkidit olbmuid heakkaid, dearvvašvuođa, dorvvolašvuođa ja doaimmaid stuorra osiin máilmmis. Dálkkádatgássain leat erenoamáš duođalaš váikkuhusat olu álgoálbmogiidda, geaidda dálkkádatrievdamat čuhcet njuolgut, ja garrasepmosit.

Dát guoská erenoamážit árktalaš álbmogiidda, gos rievdamat dáhpáhuvvet jođáneappot go muđuid máilmmis.

– Mii leat oaidnán ahte arvevuovddit garraseappot suddjejuvvojit daid guovlluin gos álgoálbmogiid vuoigatvuođat ja eananeaiggáduššan vuhtii váldo. Álgoálbmotvuoigatvuođaid vuhtii váldin dagaha ahte leat unnit sisabahkkemat mat buktet dálkkádatrievdamiid. Danne lea dát vuđolaš ja áibbas dárbbašlaš lávki boahttevaš dálkkádatčovdosiidda, dajai Keskitalo.

 

Globála dálkkádatrievdamat váikkuhit máilmmi borramušsihkarvuhtii, dagahit geafivuođa ja eará duođalaš váikkuhusaid mat bohtet mearradási loktaneamis ja ekstremadálkkiin.

Keskitalo deattuha ahte oarjemáilbmi ja industriála našuvnnat fertejit dál áddet ahte lea dárbu dálkkádatšiehtadussii mas guovddážis leat olmmošvuoigatvuođat, ja buot olbmuid vuođđu, kultuvra ja dearvvašvuohta.

– Dakkár šiehtadus, mii čielgasit dohkkeha olmmošvuoigatvuođaid ja álgoálbmotvuoigatvuođaid, lea áibbas dárbbašlaš jus galgá dovddastit ahte buot našuvnnain lea oktasaš ovddasvástádus boahttevaš globála dálkkádatčovdosiid ovddas. Dát lea ovddasvástádus mii fátmmasta olu dobbelii go juohke riikka iežaset beroštumit, dadjá Keskitalo.

-Almmuhus-