-Almmuhus-
OĐĐASAT– Álgoálbmotnissoniid vuoigatvuođat eai čalmmustahttojuvvo doarvái

– Álgoálbmotnissoniid vuoigatvuođat eai čalmmustahttojuvvo doarvái

-

-

Sámediggeráđđi Mariann Wollmann Magga searvá moaitámuššii maid Ruoŧa Sámediggi ovddida, ahte álgoálbmotnissoniid vuoigatvuođat eai čalmmustahttojuvvo doarvái ON nissonkommišuvnna čoahkkima loahppadokumeanttas.

Norgga ja Ruoŧa Sámedikkit serve njukčamánus 61. čoahkkimii ON nissonkommišuvnnas, CSW61, New Yorkas, mas lei fokus «empowerment of Indigenous women».

Sámediggi čállá Marie Persson Njajta ovddastii Ruoŧa Sámedikki ja lea beahtahallan go loahppadokumeanttas ii boađe čielgaseappot oidnosii doarjja álgoálbmotnissoniidda ja mánáide go lea sáhka eanavuoigatvuođain, ja čállá preassadieđáhusas ná:

«Mii diehtit ahte álgoálbmotnissonat, sihke Sámis ja riikkaidgaskasaččat, livčče dárbbašan garrasit sánádagaid eanavuoigatvuođaid birra ja iešmearrideami birra. Dán livččiimet háliidan vai čájehit konkrehta doarjaga álgoálbmotnissoniidda geat rahčet iešguđet riikkaid eanaduovdagiid ávkkástallamiid vuostá, eanarievidemiid vuostá, dálkkádatrievdamiid vuostá ja geat rahčet oažžut dohkkehuvvot iežaset vuoigatvuođaid. Álgoálbmotnissonat leat dávjá njunnošis suddjet eatnamiid ja čáziid mat leat vealtameahttumat min kultuvrii, biepmuide, dearvvašvuhtii ja boahtte buolvvaide. Dan dahket vaikko dihtet ahte dat sáhttá mielddisbuktit bilkidemiid ja nihttimiid, ja gáibida ollu resurssaid  ja bargonávccaid, ja dávjá sin rahčamušat čihkkojuvvojit.» 

 

Čuovvola Ruoŧa moaitámuša

Sámediggeráđđi Mariann Wollmann Magga, gii ieš searvvai ON-čoahkkimii, čuovvola Ruoŧa Sámedikki moaitámuša.

– Álgoálbmotnissoniin lea riekti hálddašit iežaset árbevirolaš eanaduovdagiid ja oassálastit bargoeallimis seamma vuoigatvuođaiguin go dievddut, lohká sámediggeráđđi Mariann Wollmann Magga preassadieđáhusastis.

ON nissonkommišuvnna čoahkkimis čalmmustahtii Norgga Sámediggi fáttáid, veahkaváldin ja álgoálbmotnissonat, ja álgoálbmotnissonat ja bargoeallin, lassilágidemiid bokte.

Sámediggeráđđi Magga searvvai maid paneladigaštallamii ON:s. Sámedikki cealkámušas CSW loahppadokumentii deattuhuvvojit maid dát fáttát.  

-Almmuhus-