-Almmuhus-
KULTUVRAÁlggii ieš ráhkadit sámegiel youtube- videoid

Álggii ieš ráhkadit sámegiel youtube- videoid

-

-

Elle Márgget Nystad mielas ledje unnán sámi youtube videot, nu ahte son mearridii álgit ieš ráhkadit youtube-videoid.

– Mun geahčan hui olu Youtube ja fuobmájin ahte váilu juoga, ja dat juoga lei sámegiella. Mun dovddan ahte sápmelččain ii leat sierra Youtube kanála maid besset geahččat, lohká Elle Márgget Nystad.

 Su mielas livččii buorre jos sámegiella oidno buot lávddiin.

– Mu mielas galgá sámegiella ja sámekultuvra oidnot buot sosiála median, ii dušše NRK Sámis ja eará sámi ásahusain, main jo vurdojuvvo oidnot ja gullot sámegiella, dadjá Nystad. 

Earenoamáš youtubekanála

– Dat mii lea earenoamáš mu youtube kánalain lea ahte mun hálan sámegiela ja ovddastan sámi kultuvrra ja nuoraid sámis. Mu ulbmiljoavku boahtá leat nuorat, dadjá Elle Márgget Nystad

 Son muitala ahte su vuosttaš video almmuhuvvo plána mielde vuossárgga ja dan videos beassat oahpásmuvvat suinna.

– Olu nuorat gehččet youtuba

– Háliidan ráhkadit videoid vai beasan buoredit mu iežan giela ja vuoi olbmot geat eai gula sámegiela  beaivválaččat sáhttet gullat sámegiela mu youtube videoid čađa. Ovdamearkka dihtii sii geat orrot máddin eai kánske gula sámegiela beaivválaččat, muitala Elle Márgget Nystad. 

 Son diehtá ge ahte eanaš nuorat eai šat geahča TV.

– Hui olu nuorat gehččet youtuba. Leat olu nuorat geat eai geahča TV, muhto gehččet dihtoris filmmaid ja videoid nugo youtubas ja netflixas.

Giela seailluheami dihtii ráhkadan youtube kanála

– Go mun ráhkadan videoid de mun buoredan iežan sámegiela. Go mun čuohpan ja geahčan iežan videoid de fuobmán ahte muhtumin dajan juoidá boastut dahje seaguhan dárogiel sániid go hálan sámegiela. Dainna lágiin oahpan ja oainnán maid ferten buoredit gielalaččat, dadjá Elle Márgget Nystad

Son oaivvilda ahte seailluha giela go almmuha videoid youtubeii.

– Mun muhtin láhkai seailluhan giela go bijan sosiála mediai sámegiel videoid. Dan dihte go sámi nuorat obbalaččat geavahit sosiála media ja gehččet youtuba beaivválaččat, de han mun seailluhan giela go ráhkadan youtube kanála sámegillii. Dat veahkeha čalmmustahttit sámi kultuvrra ja ahte sámegiella gullo maiddái youtubas nuoraid gaskkas.

Háliida olahit olles Sámi

– Mu mihttu lea ahte olbmot gehččet mu videoid miehtá sámi. Sávan maid ahte dárogielhállit gehččet mu kanála, go de soitet smiehttat ahte sámegiella lea čáffat ja nu de háliidit oahppat sámegiela, dadjá son.

Elle Márgget Nystad háliida ge movttiidahttit eará nuoraid ráhkadit videoid.

– Mun doaivvun ja sávan ahte sáhtán eará sámi nuoraid movttiidahttit ráhkadit youtube kanála. Sávan maid ahte oaččun positiivvalaš responsa ja ahte olbmot háliidit oaidnit eanet videoid mus, dadjá  son.

Boahtá ráhkadit videoid beaivválaš eallimis

Elle Márgget Nystad muitala ahte son láve ieš geahččat youtube ja muitala ahte láve geahččat dihtorspealu videoid, borramuš videoid, videoid beaivválaš eallimis ja videoid gos olbmot čájehit biktasiid.

– Mun áiggun ráhkadit videoid maid mun ieš livččen geahččat. Smihtten ahte mun áiggun ráhkadit vloggaid, mat leat videot gos čuovvu gean nu beaivválaš eallima, videoid gos mun ságaškušan sámi áššiid ja hástalus videoid, diekkár challenges, muitala son.

 Son smiehtasta veahá ja dadjá ahte festivála videoid maid soaitá fuobmát ráhkadit.

– Go festivála áiggit bohtet de sáhtán ráhkadit festival looks sámi festiválaide, smihtten maiddái goarruntutoriala go lean ieš gorron guokte gávtti, muitala Elle Márgget Nystad.

– Dehálaš doarjja

MIELAS LEA BUORRE: Noereh jođiheaddji Elen Ravna mielas lea buorre ja dehálaš go bohtet sámegillii Youtube videot. Govva: Priváhta

Noereh jođiheaddji Elen Ravna dadjá ahte orru áibbas buorre go ráhkada sámegillii videoid.

– Lea dehálaš gillii, ovddidit sámegiela dákkár arenain mat geavahuvvojit nuorain. Lea maid dehálaš jos son ovddasta sámi kultuvrra dan láhkai ahte čalmmustahtta dan, ii ge eará fáttáid mat mis leat juo nu olu, dadjá Elen Ravna.

Su mielas lea dehálaš oažžut nuoraid geavahit sámegiela eambbo.

– Dát youtubekanála lea dehálaš doarjja. Leat ollusat geat háliidit oahppat sámegiela, muhto geat dárbbašit sajiid gos besset gullat sámegiela, muđui fertejit čohkkát ja guldalit radio dahje mánáid-TV, dadjá Elen Ravna.

Duohta ahte váilot sámegielat videot

– Mu mielas lea duohta nu go dadjá ahte váilot sámegiel youtube videot, in dieđe leat go rabas sámi youtuberat geat ráhkadit videoid odne, dadjá Elen Ravna.

Son dadjá maid ahte leat máŋga vuogi mo sáhttá ovddidit ja geavahit sámegiela ja ahte mis váilot arenat gos sáhttá ovddidit sámegiela.

-Almmuhus-