Sápmi Pride lágideaddjit áigot vuot vuođđudit ođđa searvvi mii galgá ovddidit LHBTQ-sámiid áššiid. Álggaheapmi dáhpáhuvvá sámi homofiilla heajaid oktavuođas.
Sápmi Pride lágideaddjit áigot vuot vuođđudit ođđa searvvi mii galgá ovddidit LHBTQ-sámiid áššiid. Álggaheapmi dáhpáhuvvá sámi homofiilla heajaid oktavuođas.
Dán vahkkoloahpa čoahkkanit homofiillat, lesbat, bifiillat, transseksualálaččat ja queer sámit Leammuid Lemet Ándde heajaide.
Dan olis lágiduvvo maiddái čoahkkin gos vuođđudit organisašuvnna mii galgá ovddidit sin áššiid.
– Go Leammuid Lemet Ánde náitala, de leat heajat stuorámus davviriikkalaš deaivvadanbáiki bonju sámiide. Danin lea logihkalaš ja praktihkalaš lágidit organisašuvnna vuođđudančoahkkima, dieđihit Sápmi Pride lágideaddjit preassadieđáhusas.
(Ášši joatkašuvvá gova vulobealde)
Vuorkágovva: Nils Johan Vars
Gabba ii šat doaimmas
Mannan Sápmi Pride doaluid oktavuođas álggahuvvui Gabba searvi mii galggai ovddidit ja bargat LHBTQ sámiid ovddas.
Guokte mánu maŋŋel lea jođiheaddji geassádan doaimmas.
– Mii eat juksan almmolaččat ásahit searvvi. Dál lean geassádan jođiheaddjin go ferten vuoruhit skuvlabargguid ja eará doaimmaid, dadjá Gappa ovddeš jođiheaddji Dávvet Bruun-Solbakk.
(Loga eambbo gova vulobealde.)
Vuorkágovva: Nils Johan Vars
Áigu láhttun ođđa searvvis
Gabba searvvis galgá unnimusat vel nubbi geassádan stivrras, ja danin ii leat organisašuvdna doaimmas.
Dávvet Bruun-Solbakk rámida Leammuid Lemet Ándde go lea bargagoahtán ásahit ođđa searvvi.
– Lea hirbmat dehálaš bargat LHBTQ áššiiguin, ja sávan olu lihkku. Mun áiggun searvat láhttun ođđa searvái, muhto mus ii oro dilli bargat searvvis maŋŋel go álgen ođđa skuvlii mannan čavčča, lohká Bruun-Solbakk.
Ii áigon šat áŋgiruššat
Kárášjohkalaš Leammuid Lemet Ánde lea guhkit áigge áŋgiruššan ja leamaš sámi homofiillaid jietna, muhto mannan geasi logai mearridan ahte ii šat áiggo njunnošis.
Dál lea dattege fas bidjamin návccaid iežas váibmoáššái, son jođiha barggu ásahit ođđa organisašuvnna.
– Mun dadjen gal geasset ahte áiggun «penšuneret» homofiillaid-aktivistan, muhto dán in oainne dál vejolažžan. Lean jo bargagoahtán ásahit ođđa Sápmi Pride stivrra, lean áŋgiruššan sámiid sihke Norggas, Suomas ja Ruoŧas dán doibmii, čállá son iežas Facebook siiddus.
Muitala njuolggosáddagis
Sápmi Pride lágideaddjit čállet preassadieđáhusas ahte Leammuid Lemet Ánde muitala Facebook njuolggosáddagis dilálašvuođa birra odne eahkedis diibmu 20.00.
Ávvir lea geahččalan Leammuid Lemet Ándde oažžut ságaide ovdal dán, muhto son ii leamaš fáhtemis.
Ođđa organisašuvdna galgá bargagoahtit plánet 2017 Sápmi Pride doaluid mat lágiduvvojit Gironis.
