Álggahit sámedikki mánáide

Sámediggi almmuha boahtte jagi bušeahta mánnodaga boahtte vahkkus, muhto sámedikkeráđi láhtut Silje Karine Muotka ja Ann Mari Thomassen muitaleaba juo otne ovtta ođđa doaimma mii boahtte jagi ilbmá.

 – Mii cegget mánáid Sámedikki, dahje sámedikki mánáid váras, mas ulbmil lea loktet sámi mánáid ipmárdusa demokráhtalaš proseassaide. Dat addá vejolašvuođaid sámi mánáide oahpásnuvvot movt sámi servvodat lea huksejuvvon, ja oahppat sis leat maid vejolaš váikkuhit ja searvat daid politihkalaš proseassaide, lohká Thomassen.

Gáržžes bušeahtta

Muotka čilge dán jagi bušeahttas eai boađe nu ollu lassáneamit ođđa doaimmaide, ja sis lea gáržžes obbalaš rámmat. Muhto lihká áigot vuoruhit mánáid sámedikki ásahit.

 – Mii dahkat dan go dat guoská legitimitehtii, gullevašvuhtii, ja sámi mánát galget dovdat iežaset álbmotválljejuvvon orgána sin eavttuid mielde. Sii galget diehtit mii lea sámediggi, makkár sisdoallu doppe lea ja sámediggi lea maiddái sin váras ja ásahus sidjiide. Eará ásahusat, dego Stuoradiggi, leat bidjan dákkár doaimmaid mánáide johtui, ja heivehit iežaset ámadaju olggos guvlui mánáid ja nuoraid váras. Dat lea dehálaš jus mánát galget dovdat oadjebasvuođa ja gullevašvuođa sámediggái, lohká son.

Sámi mánáide

Muotka čilge mánáid sámediggi galgá doaibmat dáinna lágiin ahte sis lea sámedikkis sierra doaibma movt galgá dahkkot go mánát deaivvidit sámedikkiin.

 – Lea jurddašuvvon bidjot sierra neahttaresurssa ja guovvamánu 6. beaivvi maid oažžut sámedikkis miehta Norgga gažaldagaid skuvllain ja mánáidgárddiin, movt sii sáhttet čalmmustahttet beaivvi. Dasa maid heive mánáid sámediggi, muhto vuosttažettiin leat sámi mánát váras.

Ieš ovdal evttohan

Muotka lohká dieđusge ferte vuos mannat dievasčoahkkima čađa, ja fertet ovdánahttit jurdaga fágabirrasiin mii sáhttá addit rávvagiid movt galgá mánáid sámediggi olggosoaidnit.

 – Mis lea goit dál ekonomalaš vejolašvuohta bidjat johtui doaimma. Muotka leage ieš evttohan ovddit áigodagas dákkár doaimma bidjot johtui ja leage hui duhtavaš oažžot dán johtui. Lea stuora vejolašvuohta ahte son gii muhttomiin boahtteáiggis šaddá sámedikki presideantta, gullá sámedikki birra mánáid sámedikkis, lohká Muotka.

Muotka ja Thomassen leaba Guovdageainnus oahpponeavvoseminara oktavuođas mii lágiduvvo otne gaskavahkku golggotmánu 28. beaivvi.