Galget iskat movt báikkálaš kantuvrrat barget veahkaválddálašvuođa ja áitagiid eastademiin.
Bargobearráigeahčču álggaha NAV-kantuvrraid bearráigeahču miehtá Norgga. Dát bearráigeahččobargu galgá doaimmas leahkit gitta 2023 geassái.
– Mii diehtit makkár hástalusat NAV-bargiin leat. Sii deaivvadit olbmuiguin geat leat vártnuheamet ja bargit sáhttet vásihit sihke áitagiid ja veahkaválddálašvuođa barggus. Bargit fertejit gieđahallat geavaheddjiid dovdduid ja čilgehusaid váttis diliid birra, seammás go galget čájehit ámmátčehppodaga eai ge sáhte iežaset dovdduid čájehit. Mihttu bearráigeahčuin lea veahkehit láhčit buoret bargodili NAV-bargiide, dadjá Bargobearráigeahču direktevra Trude Vollheim.
Bargobearráigeahčču oaivvilda ahte dovduičuohcci gáibádusat, áitagat ja veahkaválddálašvuohta, eahpesávahahtti seksuálalaš fuomášupmi, ođđasisorganiseren ja soahpatmeahttunvuohta rollaid gaskka leat muhtun dain riskabeliin mat sáhttet NAV-bargiide addit sihke psyhkalaš ja fysalaš vuorjašumiid. Bargobearráigeahčču áigu iskat movt bargoaddi fuolaha dan ovddasvástádusa ahte buot bargiin lea sihkkaris bargobiras.
