Nord universitehta lea mearridan fas álggahit bacheloroahpu journalistihkas maŋŋel go báikkálaš mediaásahusat ohcalit dán.
Boahtte čavčča pláne Nord universitehta Bådådjos fas álggahit bacheloroahpu journalistihkas.
Oahppu ii leat čađahuvvon maŋimuš guovtti jagis, ja ulbmilin lea oažžut dohkkehuvvot sihke bachelor- ja masteroahpu skábmamánus.
– Mii áigut áŋgiruššat nu ahte fas beassat skuvlet gealbudahtti journalisttaid Davvi-Norgii ja maiddái eará guovlluide riikkas, lohká Nord universitehta journalistihka oahppoprográmmaovddasvástideaddji Bengt Morten Engan.
Váttis rekrutteret
Maŋŋel go Nord universitehta heaittihii bacheloroahpu journalistihkas, de leat Davvi-Norgga mediat rahčan rekrutteremis oahppan journalisttaid iežaset doaimmahusaide.
– Báikkálaš aviissaid stuorámus hástalus lea rekrutteret oahppan bargiid, ja mii vásihit ahte dát váttisvuohta dušše stuorru, dadjá Helgelendingen redaktevra Geir Arne Glad.
Journalisten fágabláđi dieđuid mielde galget boahttevaš journalistastudeanttat oažžut eanet bargohárjehallama guovllu mediain.
(©NTB)
