Sámediggi háliida gulahallat boazoealáhusain, ja leat bovden orohagaid, siiddaid ja boazoeaiggádiid gulahallančoahkkimii.
Sámediggi háliida gulahallat boazoealáhusain, ja leat bovden orohagaid, siiddaid ja boazoeaiggádiid gulahallančoahkkimii.
Čoahkkimis áigu Sámediggi čilget movt sii čuovvolit Sámedikki dieđáhusa boazodoalu birra, muhto maiddái ealáhusas gullat oaiviliid.
Sámediggebušeahtas leat várren 500 000 ruvnno boazodoallolága čielggadeapmái. Dat lea okta ášši man Muotka háliida digaštallat ealáhusain.
– Sámediggi ja maiddái Norgga Boazosápmelaččaid Riikkasearvi leat dadjan 2007 rájes, go ođđa láhka bođii, ahte láhka ii doala álbmotrievttalaš dási eamiálbmotperspektiivvas. Dál ohcalit konkrehta čovdosiid gokko galgá rievdadit vai sihkkarastá ahte doallá álbmotrievttalaš dási. Leat oaidnán áššiid mat leat diggevuogádagas, dat čájeha ahte láhka ii doaimma ja politihkka ii doaimma nu go galgá, lohká Muotka.
Čoahkkin dušše Guovdageainnus
Čoahkkin lea Guovdageainnus Thon Hoteallas. Muotka lohká ahte Guovdageainnus leat olu boazosápmelaččat, ja danne lea lunddolaš čoahkkima doallat doppe.
Son ii jáhke ahte šaddá nu ahte dušše Guovdageainnu boazosápmelaččaid jietna gullo, muhto galget maŋŋil árvvoštallat galget go doallat čoahkkima eará sajis maid.
Muđui galgá Muotka muitalit Sámedikki boazodoallopolitihka birra.
Torvald Falch lea seniorráđđeaddi Sámedikkis ja galgá muitalit konsulterenortnega birra.
Fágajođiheaddji Sámedikkis Sten Olav Heahttá galgá logaldallat Sámedikki vuosttaldanválddi birra, ja plána- ja huksenlága birra.
