Anders Boine Verstad ii lean jáhkkán son lea nu buori sihkkelastinvuoimmis dál, muhto nagodii goitge rasttildit moallasárgá nubbin. Varrasmáhkka vel njálmmis.
Anders Boine Verstad ii lean jáhkkán son lea nu buori sihkkelastinvuoimmis dál, muhto nagodii goitge rasttildit moallasárgá nubbin. Varrasmáhkka vel njálmmis.
Kárášjohkalaš Anders Boine Verstad bođii sotnabeaivvi nubbin «SSK Mila» sihkkelgilvvus Stavangeris.
Dat lei su vuosttaš gilvu dán sihkkeláigodagas, ii ge lean jáhkkán ahte galggai nu bures nagodit sihkkelastit.
Gilvvus galge sihkkelastit 10 kilomehtera, mii lei oba lossat Verstad mielas.
– Dat lea dakkár distánsa mas ferte addit measta buot vuolggas gitta mollii, lei garas ja varrasmáhkka bođii njálbmái. In lean vuordán ná buori bohtosa, go in leat nu olu hárjehallan dán jagi. Lei hui somá časkit daid Rogalándda gánddaid geat lohket sii leat Norgga buoremusat sihkkelastit ja hárjehallát, reašká Verstad. Son lea Sirpmá valáštallanjoavkkus.
Káffekultuvra
Dát gilvu lei báikkálaš gilvu Stavangeris, ja dainna Verstad álggahii dán gilvvohallanáigodaga.
Son ii dieđe vel áigu go olu gilvvuide searvat dán áigodaga, go dál son ii leat nu lássejuvvon bohtosiidda.
Muhtun gilvvuide áigu searvat, muhto son sihkkelastá go su mielas lea somás valáštallán.
Anders Boine Verstad lea 20 jagi boaris, ja lea álo valáštallan.
Son váccii valáštallanluohkás joatkkaskuvllas Ráissas, gos son hárjehalai čuoigama. Son álggii sihkkelastit go dolkkai čuoigamii.
– Sihkkelastin lea eambbo go duššo hárjehallan. Das lea veahá dakkár káffekultuvra, sáhttá mannat olbmáiguin duolbmut 3-4 diimmu, juhkat káfe ja fas duolmmastit ruoktot.
Friddja valáštallan
Son studere journalistihka Stavangeris, ja lassin bargá vel. Dan dihte ii leat šaddan nu olu hárjehallát dán jagi.
Diibmá son lei ollesáiggi valáštalli, dattege ii olahan bohtosiid maid áiggui, go buozai maid olu dan áigodaga.
Čakčat massii hárjehallanmovtta, ja heaittihii ovttasbarggu hárjeheddjiin. Dan rájes lea ieš akto hárjehallán, ja dat lea fas lokten su movtta.
– Dál lea somá hárjehallat, jus háliidan garrasit hárjehallat, de dagan dan. Jus lean váiban, de válddán gulul. Sihkkelastin lea mu mielas hui friddja valáštallan.
– In váldde nu duođas
Ieš son árvvoštallá ahte hárjehalai beare garrasit diibmá, eambbo go maid rumaš gierddai.
Son lea dál hui ilus go ieš beassá mearridit movt hárjehallá.
– Dál lean maid jagi boarrásit, lean olu dehkiid hárjehallán ja šaddan gievrrat. Lean maid jierbmábut hárjehallán. Ohppen olu diibmá go hárjehallen menddo olu. Dál dieđán maid eambbo sihkkelastima birra, ja ádden goas sáhtán garrasit vuodjit. Lean šaddan buoret sihkkelastit vaikko in leat hárjehallán olu, in ge váldde nu duođas.
Eai stuora plánat
Boahtte vahkku son čavge Mallorcai hárjehallan čoahkkaneapmái. Doppe son galgá guokte vahkku hárjehallat, muhto maid gilvalit.
Go ruoktot fas máhccá, de leat gilvvut vuordime. Seammás leat eksámenbarggut maid vuordime. Daid son ferte vuoruhit.
– In dieđe vel makkár gilvvuide searvvan, leat olu smávva ritta maidda soaittán searvat. Áidna maid dieđán lea geasset áiggun searvat «U6 Cycle Tour»ii mii leat Ruoŧas geasset. Muđui eai leat stuora plánat, lohká Verstad.
Juhká čázi ja borrala banána
Son rámiida Sirpmá valáštallanjoavkku go dorjot su.
– Sii leat veahkehan olu mu ovdáneami ja maid ekonomalaččat. Sii leat rávven mu ja veahkehan. Maiddái eará sponsorat leat veahkehan olu, lea somá go olbmuin lea jáhkku munnje, lohká son.
– Dál lea somá mannat duolbmut suohttas dihte, dovdat maid rumaš nagoda. Sihkkelastit vihtta diimmu ja borrat duššo ovtta banána, juhkat guokte čáhcebohttala, sáhtán duolbmut váikko man guhká, loahpaha Verstad.