Porsáŋggu sátnejođiheaddji Aina Borch, Alfred Lillebo maŋisboahttit ja eará berošteaddjit fitne bidjame Alfred Lillebo muitomearkka Hávnnái Porsáŋggus golggotmánu 29. beaivvi.
Porsáŋggu gielda lei bivdán Porsáŋggu Musea ráhkadit ovttasráđiid Alfred Lillebo maŋisboahttiiguin muitomearkka Alfred Lillebo muitun.
Čuđegiettis Hávdnai
Alfred Lillebo riegádii 1880 ja jámii 1969. Son lei muhtin skiippas ekspeditevra dahje bálvá, poastahoavda ja gávpealmmái. Su áhčči lei John Lillebo (1846-1932) ja su eadni ges Marie Magdalene Abrahamsdatter (1842-1932). Alfred Lillebo bajásšattai Čuđegiettis gos su váhnemiin lei gávpedoaibma. 1900-logu dálvvi ja 20 jahkásažžan lei son lonohallanstudeantan Ruoššas oahppan dihtii ruoššagiela.
Maŋŋá go su viellja, Ingval, heavvanii merrii jagi 1907:s, de doaimmahii son skiipaekspedišuvnna Čuđegiettis. Alfred álggahii maid skiipaekspedišuvnna Hávnnas ja vuođđudii fitnodaga ««Alfr. Lillebo». Fitnodagas lei dábálaš buvda ja dasa lassin vuvde maid dávviriid skiippaide. Alfred Lillebo huksii vuosttaš skiipakáija Porsáŋgui 1911:s. Sus lei ekspedišuvdna sihke Hávnnas ja Čuđegiettis gitta 1932 logu rádjái, muhto das maŋŋá dušše Hávnnas.
Nubbi máilmmisoahti
Go nubbi máilmmisoahti bođii, de bolde tuiskalaččat olles káija. Alfred Lillebo váldui fáŋgan Bánáhis 12.03.1942 ja sáddejuvvui Sydspissen fáŋgaleirii Tromsii. 15.03.1942 luite tuiskalaččat su luovus fáŋgavuođas, ja de son dollii Hávdnai ja huksegođii fas fitnodaga ođđasit. Alfred Lillebo náitalii Astri Kjelsbergain ođđajagemánu 20. beaivvi 1912 Tromssas ja soai oaččuiga guhtta máná. Sudnos leat dál oktiibuot 72 maŋisboahtti. Alfred Lillebo oaččui Gonagasa ánsomedálja 1952:s.
