Soames lea miehtá Norgga geahččalan olbmuid beahttit Čáhcesullo politiijaid telefuvdnanummariin. Politiijat ávžžuhit ahte olbmot eai vástit jus nummar 78 95 54 65 riŋge.
Nuorta-Finnmárkku politiijaide leat ollusat riŋgen miehtá Norgga, ja leat dieđihan ahte sidjiide lea riŋgen telefuvdnanummaris 78 95 54 65, mii gullá Čáhcesullo politiijastašuvdnii. Dat lea dagahan ollu aktivitehta politiijaid telefuvdnaguovddážis.
Politiijat ávžžuhit olbmuid ahte eai galgga vástidit jus dat nummar riŋge, eaige galgga riŋget ruovttoluotta dasa.
– Sii, geat leat vástidan dán nummárii, muitalit ahte nuppegeahčen telefuvnna hupmá soames heajos eaŋgalasgielain, mii almmuha iežas riŋgeme Microsoft fitnodagas dahje sullasaš. Olbmot leat de gohččojuvvon dahkat juoidá ieažaset dihtoriin. Dat lea jáhkkimis geahččaleame fillet olbmuid, lohká operašuvdnajođiheaddji Nuorta-Finnmárkku politiijaguovllus Bjørn Tormod Syversen ja politiijat ávžžuhit ahte berre heaittihit telefuvdnaságastallama dalán.
Politiijat leat dál iskame mii lea sivaid manne politiijaid telefuvdnanummar geavahuvvo. Nummar lea dál giddejuvvon, ja dasa ii sáhte riŋget.
