Fargga lea mihcamáreahket ja Vefas ávžžuha olbmuid jurdilit maid sii luitet stuora dollii.
Fargga lea mihcamáreahket ja Vefas ávžžuha olbmuid jurdilit maid sii luitet stuora dollii.
Mihcamáreahket galgá leat hávskin sihke mánáide ja rávisolbmuide, muhto dađi bahábut geavahit muhtimat mihcamárdola boaldit ruskkaid main leat várálaš mirkkut.
Márffiid bassit mirkodolas
Vefas ávžžuha dušše boaldit čielga muorraávdnasiid, go sihke suovas ja gunain sáhttá leat mirku go boalddaša bázahusaid.
– Mun in háliidivčče bassit márffiid dolas mas boaldá ruskkaid, lohká Vefas IKS hálddahuslašdirektevra Jørgen Masvik.
Biiladeahkat, impregnerejuvvon ja vuidon muorat, tekstiillat, viessodávvirat, plastihkkadávvirat, guottát ja boares fatnasat lávejit šaddat dollii. Dát leat diŋggat main sáhttet vahátlaš mirkkut mat dagahit duođalaš váikkuhusaid sihke dearvvašvuhtii ja birrasii jus dakkár ruskkaid boaldá.
(Ášši joatká gova vuolde)
Mirkkut mat dagahit dávddaid
Go boaldá ruskkaid mat leat várálaččat birrasii, de sáhttet mirkkut leat iešalddis várálaččat, dahje de sáhttet seaguhuvvot eará mirkkuiguin mat leat dolas, mii fas dahká dan mirkosuova vel váráleabbun, čilge Vefas preassadieđáhusas.
Dát mirkkut sáhttet earret eará dagahit borasdávdda, hormonmoivvi, billistit nearvvaid rupmašis, rupmaša árbeávdnasiid ja šaddat hehttehussan máná ráhkadit.
Deattaimpregnerejuvvon muorraávdnasiin lea earret eará arsen, mii šaddá arsenihkkan go dan boaldá.
Mirkkokeahtes dolasteapmi
Masvik sávvá ahte olbmot besset vásihit mirkkokeahtes mihcamárdoaluid, ja ávžžuha iskat sihke sortere.no gos gávdná dieđuid movt sirre ruskkaid ja gosa oažžu doalvut daid.
