-Almmuhus-
Beassážat 2022Álbmot mearrida gii vuoitá

Álbmot mearrida gii vuoitá

-

-

Nu go ovdal ge lea leamaš, de lea álbmot mielde mearrideamen Sámi Grand Prix vuoiti, ja ođas dán jagi lea ahte álbmogis lea vel eambbo dadjamuš go ovdal lea leamaš.

Dán jagi, nu go ovdal ge, besset geahččit jienastit iežaset jiellatlávlu ja -juoigi Sámi Grand Prix sáddaga vuolde. Dat guokte artistta ja juoigi geat oažžuba eanemus jienaid goappáge gilvalanoasis mannaba viidáseappot gollefinálii. Gollefinálas ovdanbuktiba goappaš artisttat ja goappaš juoigit ođđasit iežaska lávlaga ja luođi. Dan guovtti gaskkas galgá de juoiganoasi ja lávlunoasi vuoiti jienastuvvot.

– Dat rievdadusat leat dihtomielalaččat hábmejuvvon ja mii sávvat ahte rievdadusat dahket ahte lea somá ja gelddolaš olles sáddaga geahččat. Mii leat oaidnán vejolašvuođaid movt Sámi Grand Prix sáhttá šaddat vel ain buorebun ja somát geahččat, dajai Sámi beassášfestivála buvttadeaddji Ol-Johan Gaup Ávvirii njukčamánu gaskkamuttus. 

Álbmot mearrida gii vuoitá

Vaikko dán jagi ge lea fágajury mielde mearrideamen geat leat buoremus juoigit ja lávlut, de lea álbmot gii loahpalaččat mearrida gii vuoitá. Gollefinálas leat álbmotjienat mat mearridit 100 proseantta ja fágajurys ii leat šat dadjamuš. 

– Álgojienasteamis lea fágajury bealli ja álbmotjienat nubbi bealli. Sii de mearridit geat dat guokte buoremusa leaba geat beassaba gollefinálii, ja gollefinálas lea obbalaččat álbmotjury gii mearrida vuoiti, čilge Sámi beassášfestivála buvttadeaddji Ol-Johan Gaup. 

Buvttadeaddji dadjá ahte fágajury lea beassan mielde meroštallat geat dat guokte buoremusa leat, ja sin mielas orru eanemus njuolga de ahte álbmot mearrida gii vuoitá loahpalaččat lávlun- ja juoiganoasi. 

Ná jienasta

Jienasteapmi doaibmá seammaládje Sámi Grand Prixas go Norgga Melodi Grand Prixas. Jienasteapmi dáhpáhuvvá nrk.no/stem bokte ja dohko ferte juohkehaš ráhkadit profiilla ovdal go beassá jienastit. 

– Nu sihkkarastit maid ahte ii oktage sáhte jienastit vaikko man ollu, juohkehaš beassá jienastit golmma geardde su dahje sin geasa liiko buoremusat, dadjá Gaup. 

– Sáhttá leat ovdamunni ovdal go gilvvut álget jo mannat ráhkadit profiilla nrk.no/stem siiddus vai lea gearggus jienastit go prográmmajođiheaddjit muitaleaba ahte jienasteapmi lea rahppon, lasiha buvttadeaddji. 

-Almmuhus-