KEiiNO ožžo buot eanemus jienaid Eurohpá álbmogis ja lávlo ja juige nu bures ahte vuite ollu váimmuid lávvordateahkeda. Dál iiluda KEiiNO-Fred ollet Guovdageidnui mánnodaga.
Lea viđat geardi go Vuolleriika vuoitá ESC.
Lei Vuolleriikka Duncan Laurence gii vuittii Eurovision Song Contest ESC lávlagiin «Arcade». Norga njuikii bajas gitta viđat sadjái.
– Dát lea stuora nieguid ovddas. Lea musihkka álggos. Álot, logai vuoiti ovdal go lávllestii vuoitolávlaga nuppes.
Vuite álbmoga jienaid
Norga lei oalle vuollin listtus ovdal go gehččiid jienaid lohke, de njuikii bajás listtus, ja sii ožžo 291 jiena álbmotjuryin. Oktiibuot gárttai juryjienaiguin boađus 338 čuoggán.
KEiiNO oaččui ge buot eanemus jienaid álbmogis Eurohpá álbmogis. Dál sii ávvudit ja leat gergosat čavget čuojahit eará báikkiin lagamus áiggi ja Melodi Grand Prix juniorgilvvus.
Čavge Guovdageidnui
Fred René Buljo illuda mánnodahkii, go lea vuolgime ruoktot davás vuoiŋŋastit veahá.
– Mánnodaga áiggun vuosttažettin Guovdageidnui, go in leat leamaš doppe guđa mánnui, lohká Fred René.
– Dál gal áiggun vuoiŋŋastit, ja manan ruoktot Gártnetluohkkái vuoiŋŋastit, lohká son.
Ii ge son loga iežas jurddašit oađđit vel.
– Mun oađán ihttin go boađán ruoktot, dadjala vel.
Bohtosat:
| 1 | Nederlánda | 492 |
| 2 | Italia | 465 |
| 3 | Ruošša | 369 |
| 4 | Sveits | 360 |
| 5 | Norga | 338 |
| 6 | Ruoŧŧa | 332 |
| 7 | Azerbaijan | 297 |
| 8 | Davvi Macedonia | 295 |
| 9 | Australia | 285 |
| 10 | Islánda | 234 |
| 11 | Tsjekkia republihkka | 157 |
| 12 | Danmárku | 120 |
| 13 | Slovenia | 105 |
| 14 | Frankriika | 105 |
| 15 | Kypros | 101 |
| 16 | Malta | 95 |
| 17 | Serbia | 92 |
| 18 | Albania | 90 |
| 19 | Estlánda | 85 |
| 20 | San Marino | 81 |
| 21 | Hellas | 71 |
| 22 | Spania | 60 |
| 23 | Israel | 47 |
| 24 | Duiska | 32 |
| 25 | Belarus | 31 |
| 26 | Englánda | 16 |
