-Almmuhus-
-Almmuhus-
SMÁVVAOĐĐASATAlbbas­nálli lassána Davvi­riikkain 

Albbas­nálli lassána Davvi­riikkain 

-

-

Dálvi albbasvakšunlogu vuođul árvvoštallo ahte lea 305 albbasbearašjoavkku Norggas ja Ruoŧas ovdal 2022 bivddu. Diimmá dálvvi ektui lea albbasnálli lassánan 25 bearašjoavkkuin, muhto guovlluid gaskkas leat stuorra erohusat.

Dan čájeha ođđa raporta man Rovdata ja Viltskadecenter leat ráhkadan Norgga Birasdirektoráhta ja Ruoŧa Luonddusuodjalanásahusa (Naturvårdsverket) ovddas. Norga ja Ruoŧŧa lea ovttasráđiid vákšon albbasnáli 2013 rájes ja geavahit seamma vuogi vákšumii. Dat guokte ásahusa vákšot albasiid golggotmánu álggu rájes guovvamánu lohppii ja vákšumis vuoruhit registreret albbasbearašjoavkkuid. 

Bearašjoavkkus lea njiŋŋelas albbas oktan čivggaiguin. Jus lea beallebearašjoavku, de lea dan dihtii go guktot riikkain johtet dat seamma albasat.

Lassánan Ruoŧas, geahppánan Norggas

Ruoŧas leat lassánan 213 bearašjoavkkus jagi 2021:s gitta 246,5 bearašjoavkku mannan dálvvi. Nálleovdáneami erohusat leat dattetge stuorrát iešguđet osiin riikkas. Davimus hálddašanguovllus leat albasat lassána ovcciin proseanttain, gaskkamus hálddašanguovllus leat lassánan 15 proseanttain ja máttimus guovllus fas 27 proseanttain.

Norggas lea fas bearašjoavkolohku geahppánan 2021:s 67 bearašjoavkkus gitta 58,5 prosentii mannan dálvvi.

– Norggas lea albbasnálli uhcit go 2021:s ja albbasnálli lea dál uhcit go dat 65 čivgama, mii lea nationála mihttomearri, lohká Rovdata jođiheaddji Jonas Kindberg. 

Albbaslohku

Vaikko bearašjoavkologu árvvoštallamis sáhttet leat meattáhusat, de lea duođaštuvvon guktot beale rájá ahte albbaslogu lohkan doallá deaivása.

Measta 1800 albasa leat dál Norggas ja Ruoŧas. Albasiid bearašjoavkku loguin árvvoštallo man galle albasa leat dan guovtti riikkas. Norggas ledje birrasii 350 albasa ovdal go earrebivdu álggii dálvit, dan botta go Ruoŧas leat birrasii 1450 albasa. Oktiibuot leat  meroštallon leahkit 1784 albasa (95 % CI = 1499-2069) ovdal jagi 2022 bivddu, čilge  Kindberg. 

-Almmuhus-