Áktor sihtá 11 jagi giddagasa albmái gii lea áššáskuhtton niibbiin goddán polskalaš albmá Leavnnjas diimmá juovlamánus.
40-jahkásaš polskalaš varddii jámas go lei niibbiin čukkohallan raddái.
Diggeášši áššáskuhtton albmá vuostá lea dán vahkku leamaš Sis-Finnmárkku diggegottis. Loahppačuoččuhusas bearjadaga bivddii áktor áššáskuhtton albmái 11 jagi giddagasa, čállá iFinnmark.
Ii dovddastan sivalažžan
Áššáskuhtton almmái ii dovddastan sivalažžan goddimis go diggeášši álggii vuossárgga.
Áktora dieđuid mielde galgá leamaš riidu dan 31-jahkásaš áššáskuhtton albmás ja goddon albmás ovdal niibečuggesteami juovlamánu 3. beaivvi diibmá. Áššáskuhtton almmái vieččai guokte niibbi gievkkanis ja čohkkedii stullui.
Dikkis čilgii áššáskuhtton almmái ahte nubbi almmái dohppii su giehtalađđasiidda ja loktii su dan botta go son doalai niibbiid, ovdal go bálkestuvvui láhttái.
– Dasto orui dego ahte sus šattai oaivejorggis, fáhkka lei son veallámin mu bálddas láhttis, ja sus golggai olu varra, čilgii son dikkis.
Čuoččuhii eaktodáhtolaš dahkun
Áktor, stáhtaadvokáhtta Tor Børge Nordmo, logai dikkis ahte su oainnu mielde goddin lei dahkkon eaktodáhtolašvuođain, ii ge lean lihkohisvuohta, ja čujuha dasa ahte almmái lea ieš viežžan niibbiid ja lei láhčán dáhpáhussii.
– Son lei sáhttit guođđit dilálašvuođa, dadjá áktor iežas loahpaákkastallamis.
