Dan botta go Nationálateáhteris lohket Duohtavuođa- ja soabahankommišuvnna raportta pearpmas perbmii, de sámi nuorat čoahkkanit fas Osloi. Sihke bearjadaga ja lávvardaga leat demonstrašuvnnat.
Bearjadaga čoahkkanit šloahta olggobeallái go gonagas lea stáhtaráđis. Lávvardaga čoahkkanit ges olggobeallái Stuoradikki.
Akšuvnnat bearjadaga ja lávvardaga
– Bearjadaga leat gollan 599 beaivvi dan rájes go Alimusriekti celkkii ahte Fovse bieggafápmorusttet rihkku olmmošvuoigatvuođaid. Bearjadaga lea gonagas stáhtaráđis ja mii dáhttut leat olggobealde muittuhit sin ahte sáhttet hehttet 100 ođđa beaivvi nu ahte eai daga maidege politihkalaččat. Ii šatta jaska, nu guhká go olmmošvuoigatvuođarihkkun dáhpáhuvvá, celket NSR nuorat ja Natur og Ungdom Facebook-siiddus.
Akšuvnnat álget diibmu 10:s.
– Servet fal lobálaš akšuvnnaide šloahta olggobeallái. Bieggaturbiinnaid fertejit gaikut ja eatnamat fertejit máhcahit Fovsen sámiide, celket lágideaddjit.
Lávvardaga leages 600 beaivvi gollan Alimusrievtti duomu rájes. Dalle, gaskkal diibmu 14 ja 15 deaivvadit ges olggobealde Stuorradikki. Doppe lea doarjjačalmmustahttin ovdal go vázzet ráiddus.
– Bovde buohkaid geaid dovddat
– 500 beaivvi duššin dagai stáhta ovttajienalaš Alimusrievtti duomu ja Fovsen-sámiid vuoigatvuođaid. Dalle leimmet gallánan ja nu okkuperiimet oljo- ja energiijadepartemeantta 4 jándora. Miehtá Norgga ja Sámi bohte dalle aktionisttat ja mii devddiimet ráđđehuskvartála ja giddiimet vel oktiibuot 10 departemeantta. Dalle čoahkkanedje 2000 olbmo Stuorradikki olggobeallái ja ráđđehus bággejuvvui mieđihit vuoigatvuođarihkkuma ja šallošit Fovsen-sámiide. Dan rájes lea jaskkodan. Mii dáhttut dál muittuhit ráđđehusa ja dáhttut čájehit Fovsen-sámiide ahte eai dárbbaš okto rahčat. Boađe Osloi ja váldde mielde buohkaid geaid dovddat, čállet NSR nuorat ja Natur og Ungdom.
