Bearalmohkki lágida dán jagi, nu go diibmá, adveantakaleandara mii galgá buohkaid movttiidahttit lihkadit olgun.
Bearjadaga, skábmamánu 27. beaivvi álggahuvvo nu gohčoduvvon JuleSPREK. Tuvraaktivitehta mii bistá olles juovlamánu ja ođđajagimánu. Dat lea veahá earálágan adveantakaleanddar, mas leat golbma ođđa tuvrra juohke suohkanis juohke bearjadaga miehtá adveantta.
Čieža suohkana fárus
Suohkanat mat leat mielde dán jagáš JuleSPREKAS, leat Bearalváhki, Hámmárfeasta, Kárášjohka, Guovdageaidnu, Porsáŋgu, Mátta-Várjjat ja Várggát.
Juohke bearjadaga dán čieža suohkanis almmuhuvvojit golbma ođđa mátkki juohke bearjadaga miehtá adveantta: skábmamánu 27. beaivvi, juovlamánu 4. beaivvi, juovlamánu 11. beaivvi ja juovlamánu 18. beaivvi.
Oanehis tuvrražat heivehuvvon stuorráide ja smávváide
Tuvrrat mat gusket dán adveantakaleandarii leat heivehuvvon sevdnjes áigái. Leat oanehis tuvrražat lagasbirrasis maidda sihke stuorrát ja smávvát sáhttet searvat. Eanas gaskkaid sáhttá vázzit, muhto muhtun mátkkiid soaitá buoremus čuoigat.
